西班牙傳媒報道，巴黎聖日耳門（PSG）體育總監李安納度，計劃向陣中嘅巴西球星尼馬開出64萬鎊周薪，相當於年薪3,300萬鎊嘅新合約，利誘現年28歲嘅尼馬踢到2025年，希望借此粉碎佢重投巴塞嘅傳聞。法國《隊報》更指出，現時尼馬同PSG嘅合約喺22年夏天到期，如果尼馬接受新約，就拉近同兩大球王美斯同基斯坦奴朗拿度（C朗）嘅薪酬。
目前周薪達60萬鎊嘅尼馬係PSG陣中人工最高嘅球員，比起攞緊37萬鎊周薪嘅基利安麥巴比多咗超過三分一。加上巴塞隆拿受到武肺疫情嚴重打擊收入，球員將要接受減薪70%用嚟補貼其他球會員工，巴塞應該冇錢簽番尼馬喇。假如尼馬簽呢張新合約，就好大機會將自己職業生涯最後嘅黃金時間留喺法國，事關新合約到期嗰陣尼馬已經33歲。如果唔簽嘅話，PSG喺餘下嘅年半時間，唔知會將佢拋售，定係將佢雪藏呢？