陳欣妍同沈殷怡因主持ViuTV節目《美女郊遊遊》而為人熟識，Ig關注人數直線上升。不過日前陳欣妍就喺Ig開直播，唔係post性感健身片，反而係感性地同網民分享近年委屈被滋擾嘅辛酸史，其間更講到聲淚俱下，令網民非常心痛。
假扮男友
陳欣妍喺直播中透露最近兩年一直受到神秘人滋擾，對方除咗開設多個賬號留淫穢留言外，又會假扮成同佢拍拖已經三年嘅男友沈震軒，入侵佢嘅社交圈，又滋擾佢Ig中嘅朋友。除咗社交網絡上滋擾，陳欣妍指對方仲試過喺佢健身嘅地方，以大字報形式公開佢住址，仲寫上「唔使妄想有工開」、「唔會紅得起」等恐嚇字句，令佢極其困擾。雖然陳欣妍曾就此事報警，但最後得到嘅回覆竟然係「冇嘢可以做到」。
韓劇啟發
對於神秘人嘅身份，陳欣妍直言知道對方係一位已有多時冇聯絡嘅舊相識，過往佢一直啞忍係因為苦無良策，直到早前佢睇韓劇《愛的迫降》時，被當中一段小孩被欺凌嘅戲份而啟發，所以決定講出呢件事。
好多網民都替陳欣妍擔心，想保護佢之餘，又希望幫佢搵出解決方法。而身為陳欣妍男友嘅沈震軒，早前曾公開支持女友健康性感就冇問題，同時又替女友於網上平台分享新節目宣傳谷人氣，對於今次女友被欺凌，唔知佢會唔會代女友出頭呢？
撰文：馮仁昭