【本報訊】逆權運動至今超過7,000人被捕，仍有約百人在不同院所還柙。早前社福界立法會議員邵家臻在facebook撰文，呼籲申請成為懲教署私人膳食供應商。葵涌廣場一間小食店1月底遞表，4月中成功申請做勵敬懲教所的首間供應商。獄中煎熬不能言喻，店主Nic說是蝕住做，「係想鼓勵同支持入面手足，希望佢哋有啖好食，知道原來出面嘅人冇忘記佢哋」。
記者：黃翠儀
還柙人士一般較在囚人士有較多權利，例如可申請「私家飯」，即由家屬向供應商訂餐。不過，一直關注囚權的邵家臻指出，目前全港七間有還柙人士院所，其實只有五間「有得揀」，否則只能進食俗稱「大棚飯」的獄中膳食。食店潮食閣日前在專頁公佈成功申請做供應商，簽約為期一年，昨便為還柙人士煮第一餐，包括一份給當日要上庭人士的「上庭餐」。
平時小店中午12時才開始營業，為了準備懲教定單要多聘請兩人，自此清晨6時便要開門煮早餐。Nic說，因環保等理由不可用發泡膠盒，要改用成本高數倍的可降解餐盒並附上木製餐具，為免衞生問題亦不宜提供生冷食品，「我哋餐單盡量多菜少肉，健康均衡飲食為主，午餐晚餐基本配備一碟油菜或炒菜。」
邵家臻食「大棚飯」狂嘔
「大棚飯」出名難食，曾服刑的邵家臻指出膳食無味、份量不足及營養不夠這三大問題，「乜汁都係冇味，尤其是纖維唔夠，好多囚友去廁所有問題；連米都特別差，因為好興朝早煮一日嘅飯，下晝、夜晚翻蒸。」
邵家臻回憶入獄的第一天便吃到那條傳說中的炸魚，當晚更不適至噴射式嘔吐，「因為條魚冇清內臟就炸，而且用萬年油，就算捱得過嗰個腥，食完都會成身火瘡。」
邵家臻指，近數月武漢肺炎疫情亦影響上庭日期，一頓私家飯只希望令獄中人「冇咁難捱」，「呢種好似無期還柙，同無期徒刑差唔多，延後又延後，延後到幾時？係唔知嘅。」
按懲教署要求，供應商必須提供每日早午晚三餐按時送到，每餐要有四款選擇，定單要訂足一星期七日三餐。單是上述要求，已令不少食肆卻步，而且獲批有一定難度，邵家臻指，食物安全及保安理由是兩大難關，「食肆同院所車程耐唔耐？又例如平時你星期日唔開，點解為咗十零個懲教外賣要開埋星期日？保安理由可以質問好多嘢。」
「最好就唔使做呢啲餐」
獲悉申請成功後，Nic心情複雜，「見到有私家飯成百幾蚊一個火腩飯，我哋就定價每餐50蚊左右，希望易啲負擔得到，其實最好就唔使做呢啲餐，但係一日有手足還柙，都需要有人去做。」食店同時申請成為荔枝角及壁屋懲教所的供應商，正候審批。據悉，有其他食店亦在嘗試申請。