效力祖雲達斯嘅葡萄牙球星基斯坦奴朗拿度（C朗），早前因意大利武漢肺炎疫情嚴重，加上阿媽中風入院，已返到家鄉馬德拉島避疫。適逢上個禮拜五C朗嘅侄女21歲生日，大家竟揀咗去C朗一座海邊公寓舉行生日派對。
從網傳嘅片段所見，party現場超過10人聚集，除咗C朗同女友佐真娜之外，就連出咗院嘅C朗媽亦有出席，場面熱鬧之餘大家似乎唔怕疫情，未有保持適當嘅社交距離，同C朗喺社交媒體上呼籲我哋「#Stayhomestaysafe」有出入喎。不過網民仲留意到公寓牆上嘅一張合成畫作，左邊係C朗同兒子攞住金球獎嘅畫像，右邊就畫咗C朗嘅父親。外媒話由於C朗嘅父親喺52歲因肝衰竭早逝，見證唔到C朗嘅成就，所以佢專誠整咗呢張三代同堂嘅畫作，將金球獎嘅喜悅同天上嘅父親分享。