負責評選年度球員最高殊榮之一、歐洲金球獎嘅法國足球雜誌《隊報》早前搞咗個投票，畀網民一人一票投選心目中嘅法國國家隊史上最佳11人同埋教練。講最強嘅法國，相信唔少人都認同係連贏98世盃同00歐國盃嗰隊，今次投票結果亦都體現出嚟，11人裏面佔9個係嚟自呢個黃金時代，仲有兩個係昔日球王柏天尼同有望成為未來法國球王嘅基利安麥巴比。
施丹大熱迪甘斯最威
98年世盃決賽絕對經典，當年東道主法國由隊長迪甘斯同球王施丹領軍，喺決賽以3:0大勝熱門巴西，幫法國捧到第一個世界盃。當年港產片《賭俠1999》都有攞呢場波嚟惡搞，化骨龍扮嘅朗拿度做假製造巴西反勝法國3:2嘅賽果，當然現實中冇呢回事喇！呢次由《隊報》搞嘅投票玩法係細分出球隊10個位置加埋教練畀球迷投票，結果98陣容大獲全勝，有九人獲選，包括門將巴夫斯；後衞杜林、白蘭斯、迪西里、李沙拉素；防中迪甘斯、韋拉；左中場施丹同埋前鋒亨利，其中施丹係各位置投票中得票率最高，有成94%，勁拋離第2位得3%嘅列貝利，有份喺98同00年捧盃嘅皮利斯，只得2%。
喺最佳11人非98一代嘅入選球員，包括80年代法國球王柏天尼，佢先係法國首奪國際大賽嘅先驅，84年以隊長身份領軍贏歐國盃。另一位係右中場位置嘅麥巴比，呢位18俄羅斯世盃冠軍功臣佔50%得票率，險勝已故名將、得票40%嘅高柏。最後就係教練位置，睇吓個名又係迪甘斯，佢喺兩年前成為法國史上第一個先後以球員同教練身份贏世界盃，力壓98年世盃冠軍教頭積基特，迪甘斯擸埋呢個位都算有說服力嘅。投票嘅嘢難免會受唔同因素影響，有人話公平亦會有人話唔同意，80年代嘅法國除咗柏天尼外都係粒粒皆星，再睇番年代久遠啲嘅58年攞世盃季軍嗰隊，前鋒方亭嘅單屆世盃入13球嘅紀錄，至今都冇人破到，唔少人覺得58年人腳竟然冇人入選實在講唔通。
基奧特落車快投國際
至於18年俄羅斯世界盃冠軍功臣之一嘅前鋒基奧特，季後約滿英超車路士後將唔會留喺球隊，亦盛傳佢已經同意甲國際米蘭傾掂個人條件，喺轉會窗重開之後加盟藍黑軍團，簽約兩年，年薪仲高達650萬歐元（約5,400萬港元）。過去基奧特一直同國際米蘭扯上關係，冬季轉會窗時仲話會同曼聯嘅艾舒利楊格齊齊轉戰意甲，但最後只有後者來投，基奧特就繼續留喺車路士。當時有指因車仔向國際米蘭要求800至1,000萬歐元嘅轉會費，但基奧特嘅合約只係得番下半年，國際米蘭當然唔會科水，等佢季尾約滿後免費加盟喇。