中聯辦同港澳辦早排發文鬧郭榮鏗拖延立會選主席，西環仲玩埋自行釋法，將自己釋到變太上皇，唔受《基本法》22條管，成班建制派盲撐西環，身兼行會成員嘅新民黨主席葉劉淑儀仲特別喺fb發帖，話西環干預香港事務冇問題，又話港官唔識《基本法》，但前日有網民翻葉劉舊賬，拎返2017年佢選特首嗰陣嘅競選團隊總新聞主任彭仕敦（Mark Pinkstone）寫嘅文，大鬧西環操控特首戰，阻葉劉入閘，明顯違反《基本法》第22條。面對俾人翻舊賬，葉劉會點呢？好簡單，立即同幫過佢嘅人割席！
「外國人唔理解《基本法》」
話說公民黨譚文豪噚日喺立法會政制事務委員會就拎返彭仕敦篇文，鬧葉劉「自己啲人」都咁講，竟然夠膽今時今日嚟轉軚撐西環？葉劉繼續堅稱政府官員唔理解《基本法》，又或者要糾正錯誤係「唔出奇」，「因為佢哋（官員）成日調來調去，冇乜集體回憶」。葉劉之後連彭仕敦都割埋，話彭仕敦係外國人，唔理解《基本法》係唔出奇，仲話「我哋根本唔需要理會」。有民主派話當年彭仕敦出文幫你，又話見你葉劉出聲話篇文有問題，幾年之後見風向轉就插彭仕敦唔理解《基本法》，又叫人唔使理，真係以後仲有人肯幫葉劉賣命？