早排才子陶傑喺佢個專欄上，寫世界衞生組織總幹事譚德塞同中共有枱底交易，引嚟成日喺fb刷存在感嘅全國政協副主席梁振英反擊，原本陶傑唔多想理佢，點知689噚日喺fb貼咗篇Lady GaGa讚譚德塞係巨星嘅報道，懶醒質問陶傑有話說嗎？
唔知Lady GaGa撐藏獨
其實以為自己好醒嘅689挑才子機，又唔自點知陶傑喺自己嘅fb貼咗張Lady GaGa同達賴喇嘛合照，再加句叫689同藏獨天后Lady GaGa一齊祝禱達賴喇嘛健康長壽，即時秒殺689。量吓自己有幾多料，同送上門俾人侮辱冇乜分別，陶傑喺個po一開始就已經對689打面，話有人「傳來不相干人的一個facebook，原來是我專欄的一名Stalker、中國政協副主席梁振英」，之後就話呢個「國家領導人」要透過佢認為優越一等嘅英語白人歌星Lady GaGa加持讚譚德塞，但引述好多網民提示，話689透過Lady GaGa同譚德塞，都係達賴喇嘛的支持者喎！
陶傑仲未踩完呀，佢話雖然愛國陣營內部話，689因政治智商有問題而俾習近平主席決定不予續任特首，但佢相信「對達賴喇嘛的立場，佢（689）、Lady GaGa、我，加埋譚德塞，四方立場一致」。至於689問陶傑有乜話要說？陶傑話當然有嘢要講：「與藏獨天后Lady GaGa、中國政協副主席梁振英一起，我祝禱達賴喇嘛健康長壽。」簡簡單就KO咗689，完全不費吹灰之力。
李八方