武漢肺炎疫情肆虐歐洲，但依然有人輕視疫情。早前講過更多人寧願感染都唔想失業嘅前德國國家隊門將列文，近期又話德甲復賽後，一個坐70,000人嘅球場只要畀20,000人入場，大家就有安全距離，呢番言論當然俾人炮轟喇。最近德國盛傳可望喺下個月九日重開賽事，不過預計餘下球季都要閉門作賽。但列文喺一個電視節目中就話：「好似拜仁主場安聯球場可以容納70,000名球迷，點解唔可以畀20,000人入場，咁場內嘅球迷就有足夠距離避免密切接觸。」先唔講點做到20,000人入場但係可以避免密切接觸，更重要係德國政府要求所有公眾活動取消到八月，仲邊有球迷可以入到場呢？