武漢肺炎危機未解除，宅在家要找娛樂，煲劇是一個好選擇，不過現今找資源不難，揀出好嘢才難，所以今日起，逢星期二及五會有這個專欄，向大家推介有乜可煲。
芸芸劇海之中，很容易錯過好劇，好像大家都睇的Netflix，當中《黑錢勝地》（Ozark）就是頂尖製作，但香港冇乜傳媒講。
說冷門一點不冷門，蔡瀾在專欄中有推介過，劇中新演員Julia Garner於上年艾美獎劇情組奪得最佳女配角，她寂寂無聞，能打贏《權力遊戲》（Game of Thrones）其他四位提名，實力備受肯定。
負責主創及做男主角的積遜比曼（Jason Bateman）在香港知名度不高，他早年憑電視喜劇《Arrested Development》在美國走紅，之後拍過不少大製作電影，成為荷李活一線紅星。今次回歸拍劇，相信只因為可以全權話事，而且終於可以認真做戲，發揮演技。
積遜比曼一直形象搞笑，每每出場隔數分鐘也要講句笑話，今次拍《黑錢勝地》卻主調黑暗，好在他之前做喜劇，也愛做被生活壓迫的中產，結果延續形象，出奇地融合。
好了，是時候講講最好睇係乜！以黑錢為題材的劇集電影很多，但沒有像《黑錢勝地》般，詳細講如何使一大嚿黑錢。劇中最吸引的，莫過於男主角很痛苦地想辦法用盡黑錢，而且又要想辦法把錢賺回來。
劇集故事講男主角因被好友偷錢拖累，被黑幫追數，結果他情急之下提議幫大佬到鄉間洗黑錢，隨口亂噏的他然後一定要去實行，而且要帶住一仔一女及一個剛被他發現偷食的老婆，而男主角只是一個平凡會計師，要經營各種黑暗行業洗黑錢，自然困難重重。
故事本來好天馬行空，妙在細節上處理得好，令觀眾容易代入，感覺上你同我攞住呢筆錢，都可以依照男主角的方法，去到一個地方發圍兼任意妄為。劇集上月尾剛剛推出第三季，講男主角因洗黑錢越來越發，雖然就快可以脫離黑社會魔掌，但他開始發到不想脫離。
當有龐大利益及壓力，入魔話咁易，相信大家都心中有數。
撰文：翁可人