武漢肺炎禍延全球，唔少學者都話呢場疫症會嚴重打擊經濟，隨時引發1930年代大蕭條以嚟最嚴重嘅衰退。歐洲議會議員科恩本迪特就更加誇張，話職業體壇將會好似俾核彈炸過咁樣，乜都要從頭嚟過，球員身價亦會暴跌，原本叫價2億歐元（約16.9億港元）嘅巴黎聖日耳門前鋒基利安麥巴比，到時可能只需要4,000萬歐元就買得到，認真大想頭。如果麥巴比效力球會巴黎聖日耳門（PSG）真係將佢標呢個價，除咗盛傳想買佢嘅皇家馬德里之外，仲有大把其他球會排隊爭住要。
皇馬明夏想接貨
呢位法國政客日前喺報章撰文，話當武肺疫情平息之後，作為全國最搶手球員嘅麥巴比，身價將會跌到大約3,500萬至4,000萬歐元，即係兩折大特賣。佢又預言疫情將會修復𠵱家亂晒大籠嘅職業體壇，就好似啲嘢俾核彈炸完，要去第二度重建一樣。科恩本迪特話，體壇會受到更多規範，仲會引入薪酬上限，就連球員嘅廣告同肖像權收入都會大減，而足球轉播合約亦會規定，要抽番部份錢去資助奧運同埋業餘運動員。
聽完呢位仁兄咁講，一直對麥巴比虎視眈眈嘅皇家馬德里都可以話係執身彩。佢哋原來諗住喺出年夏天，趁麥巴比得番一年約，向PSG收購呢位21歲法國國腳，好彩雙方仲未達成協議，唔係就實行要摸頂接貨。不過諗深一層，講到兩折價錢就買到呢位新星，又似乎過份咗少少。PSG喺2018年用咗1.45億歐元，將佢由摩納哥買番嚟，𠵱家連零頭都收唔番，你真係當人儍㗎咩。據transfermarkt網站嘅估計，其實麥巴比𠵱家仲值成1.8億歐元，有排都未跌得到落去4,000萬歐元。
紅軍促銷沙基利
不過，球星身價喺疫情下下跌都好正常，利物浦就打算減價促銷梳頓沙基利。紅軍2年前以1,500萬歐元由史篤城買入呢位瑞士國腳，但由於中場人才濟濟，佢今季已經冇乜出場機會，所以球會就諗住以3,200萬歐元將佢賣走。雖然西維爾、羅馬同莫斯科中央陸軍都想接手，但見到個價錢都窒咗一窒。
