港府同差人前日出招大搜捕，一次過拉15名民主派人士，話佢哋涉組織同參與8.18、10.1同10.20三次集會同遊行，黃之鋒前日就話，差人拉咁多人係醉翁之意不在酒，實際想拎佢哋部電話搵料，不過原來差人唔係個個人部電話都收，佢哋竟然冇扣起李卓人部電話！不過當然唔係優待阿人，而係扣起都冇用。
話說前日好多人以為阿人部電話俾差人扣起，但八方打佢手提又搵到佢！八方問阿人唔通差人對佢有優待？阿人話梗唔係！因為差人扣佢部電話都冇用，因為佢部係新電話，入面乜料都冇，因為今年2月佢俾差人以參與未經警方批准嘅8.31遊行拉，當時已扣留佢部電話，之後佢再出過部電話，而呢部新機完全冇料喺機入面，不過佢話好彩差人冇收呢部電話，否則又要出過部手機，咪話唔肉痛。
吳靄儀冇機可扣
又有民主派同八方講，差人亦應該扣唔到吳靄儀部電話，因為Margaret根本冇電話畀佢收！因為民主派皆知Margaret唔止一向唔用智能電話，連手提電話都冇，試問差人又點沒收呢？
不過，即使差人扣起手提電話，又係咪可以搵到料？有民主派中人同八方講，其實好多民主派人士早已將手機入面敏感資料刪走，剩番嘅料基本上冇秘密可言，更有人將部手機入面電郵都清晒，即使自己被拉，差人都唔會喺手機搵到乜嘢。
李八方