內地網民及本地藍絲組織要唱衰特朗普及美國，容易到冇人有，美國傳媒有大把攻擊、批評特朗普嘅文章，一google就有。冷戰時代有一個美蘇笑話，美國商人在莫斯科對俄羅斯客戶講：「我日日可以鬧列根總統，走去白宮前面舉牌示威都得，因為我地有言論自由。」蘇聯人回答：「我都有言論自由啫，我可以去克里姆林宮外面，舉牌大罵列根總統。」
今天之中國大陸人亦如是，環球時報胡錫進可以日日鬧美國，但不敢半句話黨中央不是。美國商人罵總統，平常之極；中國商人任志強講一句半句，就立即失聯，違法違紀嘞。
CNN有段報導，話現在中國科學家如要撰寫有關C19論文，發表前一定要經過上級審核，即是要由黨委書記層層請示啦，形同學術檢查。檢查啲乜嘢呢？左丁山唔明，用WhatsApp轉發CNN之報導畀一位相熟科學家，佢與內地學者不時聯絡切磋，知道若干避忌㗎。科學家S回覆：「未聽聞論文要層層審核，不過已知有兩個無形禁區，就係寫親COVID-19研究，一不能講病毒係在中國起源，二就係中國從不隱瞞疫情。」吓，袁國勇、何大一好似都講過肺炎病毒初起於武漢喎！科學家S答：「袁何兩位大教授只識科學，未曾瞭解國情。」
做科學研究要先瞭解國情，知道邊啲係禁區，邊啲寫得，可以大力宣傳，邊啲唔寫得，要避重就輕嘅話，點做到一流科學研究呀，如日本流行語，科研水平會向下流噃。科學家S真幽默，答多一句：「點止水平向下流，人都變下流。」
唔怪得袁國勇講多咗，就畀藍絲攻擊到體無完膚，好多人或者忘記咗，港大有一位名教授管軼，SARS病毒專家，內地人，一月曾到武漢觀察，跟住回港，講過一句：「華南海鮮市場。」沒有了「證據」，仲畀屈才女鬧佢逃跑了。管軼教授之後隱形，不再見傳媒，也不見發表任何意見，管教授來自內地，瞭解國情一定比袁國勇清楚得多。
武漢疫情演變成為21世紀迄今最大災難，全球有220萬人以上患疫，近15萬人死亡，死亡率高達6.7%，未來十年，一定有不少學術論文以此為題，從醫學、公共衛生、政治、經濟、心理、精神健康各方面探討。香港人對此有乜可為呢？左丁山希望有文學小說家能就此寫一本小說深入探討C19陰霾下之人文精神，人與人之關係，人性美麗與醜惡等等，流傳後世，香港文學界有志者，欲媲美卡繆之《瘟疫》，此其時也。