現年39歲金剛同有34D火辣身材嘅29歲前台灣「國光女神」梁云菲（Nana）拍拖一年，經常喺Ig放閃，大前日佢哋一齊主持網上節目，仲透露考慮兩年內結婚。不過金剛前晚突然喺Ig貼出一張黑白相兼留言：「R.I.P」，取消關注Nana，又刪走佢哋大部份甜蜜相。事後，金剛嘅經理人向台灣蘋果新聞網證實佢哋已和平分手，而金剛噚日喺fb出貼文，貼出一張紋身相，留言：「其實甚麼理由都不重要了！雖然很痛，也很錯愕，但還是要祝福，希望你能朝着你的夢想去飛吧！」
據了解金剛喺前晚無預警下「被分手」，大前日佢同Nana一齊主持網上節目，Nana亦有喺社交平台上載自拍照，不過似有弦外之音，留言：「當你眼淚忍不住要流出來的時候，睜大眼睛，千萬別眨眼。你會看到世界由清晰變模糊的全過程，然後在淚水落下的那一刻一切變得清澈。」
嘗試為彼此改變
其後Nana接受台灣蘋果新聞網訪問時爆分手原因：「兩人分開會有一定的原因存在，我們都很認真的努力過、嘗試過、溝通過，甚至是為了彼此改變，互相磨合。而最終的答案也是共同討論出的結果。每段感情都是人生中重要的一課，我們將會留下最美好的回憶，謝謝對方的付出，也謝謝自己勇敢的面對一切。」有指佢哋交往期間，金剛當Nana好似小公主呵護， 但熱戀期過後，佢哋開始爭吵，Nana更覺得金剛管自己管得太多。
撰文：馮仁昭