左丁山識得朋友多，有不同朋友WhatsApp群組，每個群組都有藍絲朋友，彼此相識幾十年，以前只係講飲講食講波講馬講子女教育及講股票，點知去年七月後，呢類平時唔講政治乜滯嘅朋友突然大量轉發（forward）不知名作者文章及外地英文文章（讚中國罵美國）到群組，甚至一啲不見經傳或者係西方邊緣化左膠機構（即專門反美反殖反資本主義）撰寫嘅文字，都一樣照轉發。
人人都有工作，上班，佢哋邊度有咁多時間上YouTube，上網，閱讀大量硬料如甚麼Global Research，平時聽都未聽過，及閱讀WHO幾十頁紙嘅報告呀？九成九都係有心人在後面組織、搜集反美親中親WHO嘅文字，交付畀「發放中心」，直傳畀藍絲群組，再由佢地周圍廣傳。呢啲事要有錢有人有力有心先至做得到，全世界嘅民主派都難有此資源、團結力及齊心。
好似前日各群組一同轉發（1）WHO 40頁報告，（2）Jeffrey Sachs（哥倫比亞大學經濟學教授）在歐洲演講批評美國及特朗普；（3）一位署名王富年發表一篇極長之陰謀論來痛批美國搞事（由肺炎講起），及（4）劍橋大學教授發表在美國之論文講肺炎有ABC三種病毒，詮釋為C19源頭在美國……
藍絲朋友問左丁山知唔知美國啲衰嘢？梗係知呢，挖美國衰嘢，特朗普瘀事，好簡單，上CNN、紐時、MSNBC就知道晒，不費吹灰之力，美國勝在有言論自由，係人都可以鬧政府，Sachs周街鬧完特朗普及美國，仍然可以輕鬆返回哥倫比亞大學領取超高薪（2002年哥大向哈佛挖角，以年薪30萬美元請Sachs過檔），大西洋The Atlantic可以連珠發炮，長篇大論批評特朗普要為美國疫情失控負全責。航空母艦羅斯福號艦長被炒，華春瑩話美國鎮壓言論自由，佢會唔會諗吓，遼寧號艦長敢唔敢公開表達個人意見？許章潤教授可唔可以返回清華教書？任志強可唔可以請律師上庭為佢違法違紀事件公開辯護？
藍絲大可以講習近平英明神武，處事英明行事決斷，用兵如神，古有孫子，今有習總（央視如是云），運籌帷幄，決勝千里之外，人在北京，為武漢訂下封城封區大計，安車平五路之典範，即諸葛亮復生，恐有不餘，國人有此聖君，感恩唯恐不及，安敢妄論中央哉。
推翻帝制109年了，內地人及香港藍絲，仍然擁護「安得賢皇登位天下太平」那一套，大概此是中國漢族的根性！