武肺全球大流行下，車路士名宿泰利（小圖）拍賣佢嘅其中12件足球珍藏，希望為英國國民保健（NHS）及願望成真基金（Make-A-Wish Foundation）籌集25萬鎊（約242萬港元）善款。泰利喺eBay拍賣佢喺15/16球季所着嘅波衫（圖）同隊長臂章，仲有職業生涯收集到嘅珍藏波衫，包括阿根廷球王馬勒當拿嘅簽名波衫、奧雲喺2002年世界盃英格蘭對巴西所着嘅10號波衫。泰利接受天空體育訪問話，自己受祖高爾啟發，希望作出改變︰「我想為NHS同Make-A-Wish盡可能籌募多嘅資金，唔夠4日已籌到19萬鎊，反應令人難以置信。」