上周五英超賽會同20支球隊嘅代表再次開會，會後無任何實質成果，但各球隊都有共識想完成埋呢季。英媒就爆出，喺乾塘危機逼近下，球會目標喺6月8日重開聯賽，同埋放眼喺下月18日開始復操。不過要重開賽事，就算閉門作賽都涉及觸犯英國社交距離規定嘅可能性，就算係英超聯賽都唔會有特權，一旦到時仍然未放寬人群聚集條例，到頭來可能都係唔成事。
喺上周五嘅英超會議，雖然未有確實定案，但因為贊助商同球員合約等嘅法律問題，各支球會都希望可以完成晒呢個球季餘下比賽。會議入面賽會亦強調，聯賽必須要喺絕對安全之下先會恢復，如果球季進一步延遲將有可能拖到八月，但球會梗係唔想拖咁耐啦，有指球隊正打算希望可以喺6月8日重開聯賽，並將所有比賽壓縮到六星期內踢完。
跟防疫指引難集體復操
由於英國暫代首相藍韜文喺上周四宣佈英國嘅封城令至少要維持多三星期，有指各球會最快嘅復操時間會係1個月後嘅5月18日，即盛傳聯賽重開日6月8日嘅3周前，等球員喺長時間停擺後，有更多預備時間，操番起個比賽狀態。
雖然講到英超重啟聯賽似層層，但英國政府曾經表明，足球唔會有特權，疫情之下球會同球員都唔會享有特權，依舊需要遵守政府頒佈嘅防疫措施，到時除咗可能要好似英冠英甲咁閉門作賽外，球員們向球隊報到復操後亦要隔離。
為咗遵守政府嘅防疫指引，球會都討論過，球隊復操嗰陣會有特別嘅措施，球會會喺訓練場同球場，為所有準備返嚟嘅職員甚至傳媒進行病毒測試，而球員就要喺揸車抵達訓練場時，喺車上接受武肺病毒檢測，而且球會會要求球員喺到達訓練場地前要換好訓練裝束，避免一齊使用更衣室，減少感染病毒嘅機會。另外，復操後嘅訓練模式，會參考早前已恢復訓練嘅德甲球會拜仁慕尼黑同多蒙特，以5位球員為1組，進行唔同嘅小組訓練，減少聚集嘅機會。
伊雲斯為港打氣遇手足
另外，英超球會李斯特城上周五就喺fb發佈，由中堅莊尼伊雲斯向香港球迷打氣嘅片段：「香港嘅李斯特城球迷你哋好！希望大家都能夠保持安全同埋健康，按照指引做好防疫措施。感謝你哋一路以嚟嘅支持，希望可以盡快喺安全嘅情況下返到球場比賽。」影片得到大量香港球迷回覆表示感謝，更有球迷打出「五大訴求缺一不可」的留言，如「Five demands Not ONE Less」等。