武肺肆虐，中港兩地影視製作嚴重受創，掙扎求存。黃百鳴旗下有東方影業，他認為應堅持拍攝香港風格電影，傲視全球再造奇蹟。寰亞電影的莊澄看好未來，趁機提高題材質素。寰宇老闆林小明則唱反調，認為港產片已完成歷史任務，要睇大中華市場。
黃百鳴的東方影業在疫情影響下，沒有裁員，只是凍薪，他有信心風雨過後，市民會恢復入場睇戲，據知他將開拍《反黑》和《李小龍》系列電影。黃百鳴日前接受《蘋果》訪問時說：「下半年會拍三部以上，但唔會拍賀歲片，上年全港拍得三十部戲，今年上半年冇開戲，大家要共度時艱。」又指戲院重創，他說：「去年社運，戲院生意跌四成，今年疫情，電影院生意得番三成，我旗下五間戲院養緊二百人，從未蝕過咁多錢。」
巿道低迷，但黃百鳴堅持拍香港風格電影：「我哋公司拍嘅片唔係只係拍畀香港人或內地人睇，係拍畀全世界人睇，你睇呢十年我哋拍嘅《葉問》系列喺全世界都受歡迎，外國人見到甄子丹，係叫佢Ip Man，我堅持拍香港片，攻入內地，香港係可以再造奇蹟嘅地方。只要拍電影就拍電影，唔好理咁多政治因素就得。」
創作環境變好
寰亞電影部負責人莊澄指公司暫時沒有開戲計劃，現時先搞創作，寰亞有四、五部片未上畫，他說：「疫情下反而有優勢，導演、編劇、監製都冇得出去拍戲，可以靜心坐低傾劇本，創作用視像去傾，創作環境係好咗。」對於業界未來的發展，莊澄抱樂觀態度：「我覺得香港影壇可以做落去，新人輩出，杜琪峯搞嘅鮮浪潮培養咗好多新導演出嚟。」
寰宇電影下半年計劃開拍五部電影，日前林小明在尖沙嘴接受訪問，他說：「一部係《掃毒3》，一部係華仔主演講劫機嘅《A380》，仲有一部愛情片、一部講火災災難片，另外仲會開多一部戲。」林小明指出，如果拍純香港市場電影未必能做到，他說：「我哋拍大中華市場就唔同，舊年《掃毒2》喺內地收咗十三億，今年原先有七部戲喺內地上賀歲檔，市場係有一定需求。」
林小明唱反調
林小明指請港人到內地拍片，會令成本上漲，所以傾向用內地工作人員拍攝，他說：「為減低成本，無可厚非。」劉德華主演的《拆彈專家2》原本安排在暑假上映，現在持觀望態度再決定。對於香港演員出現斷層，林小明慨嘆：「演員青黃不接唔係今日嘅事，香港要回復以前光輝係冇乜可能，呢個係歷史任務，其實係完結咗！」
採訪：鍾國仁
攝影：陳慧安、陳俊強、沈健程
