曼城球星奇雲迪布尼日前透露，自己同屋企人都感到身體唔舒服，但由於冇接受過任何檢測，所以唔知道係咪感染咗武漢肺炎。迪布尼話喺封城開始時，屋企人病咗8、9日︰「一開始係細仔，跟住係大仔，之後就輪到我太太，但我唔知道佢哋係咪受到感染。好彩嘅係我哋已經冇乜唔舒服，過去2、3個禮拜一切都好好。」呢位比利時中場再補充：「自己只係有啲喉嚨痛，但喺四個人入面，相比起其他人我已係最好嗰個，𠵱家佢哋狀況都很好。」
另一邊，摩納哥中場法比加斯就話自己95歲嘅曾祖母，不幸確診武肺。法比仔日前接受西班牙電視頻道《La Sexta》訪問時，就話曾祖母中招︰「佢已經95歲，不幸感染咗武肺病毒。我哋希望將佢搬去酒店好好休養，事關佢住嘅老人院有70%嘅人都呈陽性。」同女友、細路身在摩納哥嘅比仔仲話︰「上個禮拜四我哋同佢透過視像通話，佢睇起嚟好好兼且好興奮，唯一唔開心係唔可以同佢一齊對抗病毒同埋擁抱佢。」