兩星期後，我們再訪龍門，看看老闆張俊傑有沒有洗心革面，更請來盧覓雪齊齊踢館。「我嘅原則係入到餐廳食飯，好食就會話好食，唔好食就會話唔好食，理得你龍門幾黃啦！」
盧覓雪說。她亦有留意網民對龍門的劣評，「我都好驚訝，龍門係因為黃店起朵，我啲朋友仲叫我唔好去，話我會鬧爆佢！」張老闆聲稱，今日的龍門已痛改前非，隨即奉上之前試食的芝士吉列豬扒撈丁、咖喱吉列豬扒飯及熱奶茶，真的如我們的期望一樣，大成功！
多一倍芝士 「可接受的味道」
「比我預期好好多！我最驚訝係撈丁嘅麵質，因為好多餐廳食到嘅即食麵或意粉，通常都好似一堆爛泥咁！佢呢個麵入口係相對爽口同分明！」芝士汁方面，盧表示：「茶餐廳嘅芝士撈丁裏面嘅芝士，其實全部都係我哋細細個用嚟夾面包、三文治嘅即食芝士，呢啲全部都唔係真芝士，不過佢呢隻人工芝士味，我接受！」張老闆表示，聽取「餐飲宗師」吳永皓的意見後，立即調整芝士在汁水裏的份量，「之前用9包卡夫芝士，而家就用夠18包，希望能夠帶出更濃的芝士味！」食物過關，被網民戲謔味如餿水的奶茶又如何呢？「我飲奶茶，首先要夠香！要先聞到佢；第二，入口要滑；第三就係茶味。龍門奶茶唯一缺點就係聞唔到佢嘅香味，但呢杯奶茶我覺得唔錯。整體嚟講，我會畀佢78分。（咁高？）你要記住，好多人都混淆咗，舉個例，去一間米芝蓮三星級餐廳食飯，我自然會用米芝蓮餐廳標準去點評，但我唔會用呢個要求去食茶餐廳。」
記者：鄧偉傑、林京賢
攝影：黎家駒、羅捷豐