唐韋琪說：「做唔到流行歌曲歌手，做咗兒歌歌手！」《長腿叔叔》主題曲響起，人人都記得Vikki姐姐，管它歌名其實叫《夢中天使》！成就了別人的童年回憶，Vikki姐姐做不成樂壇天后，好歹也是「兒歌天后」。
這位兒歌天后，最近亦面對成人世界的殘酷。一手創辦的才藝學校，疫境之下收入大減，蝕了六位數字，租金亦快捱不住，「𠵱家我都係使緊自己『老本』！」
與香港人同坐一條船，幾乎全家都是醫護的唐韋琪，感受特別深，最近她與16歲徒弟張若希合唱的抗疫歌《與你同行》，MV頭一幕就打出「致所有香港人及醫護人員」，主角有街坊有肉販有地盤工全是小市民，是真正為香港人而唱。
「不如笑住同大家講，我哋加油，一定會贏呢一場疫戰，用正能量去加油囉！」用唱兒歌的心情，向成人世界呼喚。
在才藝學校現場，即席唱了一小段的唐韋琪，唱完又消毒又洗手再清潔，很忙。
撰文：文嘉龍
攝影：陳俊強
我有啲租係遲咗交
唐韋琪的家姐、妹妹、妹夫、細佬、細佬個女，都是醫護人員，「我希望佢哋健康，亦都緊守崗位，好感激佢哋！我美國嘅家姐都係護士，佢email同WhatsApp叫我哋加油；我細妹就係助產，都要緊守崗位，因為有好多孕婦需要保護！我家姐細妹佢哋有宗教信仰，覺得係天職，覺得上天畀咗呢份工，除咗有好好收入，始終係為人民服務，覺得有使命感！」
她的姪女更是dirty team一員，「佢哋要抽籤，其實話就話要抽籤，等於係輪班，個個都會輪到㗎！大家抽到亦唔會話有怨言囉，我都問過佢哋，如果你哋抽到之後點呀，其實都係預咗抽到！佢哋覺得香港都係自己屋企，如果我唔做，邊個做呢？當然我就唔係專業啦，我都好想去幫手！」
唱抗疫歌替香港人和醫護加油，其實亦為自己打氣。唐韋琪在佐敦的才藝學校，租了兩層，好景時兩層樓同時有班上堂，如今，很多課堂取消了，轉為網上授教。
生意大受影響，「一定啦，我哋無一幸免，香港各行各業都有機會因為呢一個疫情而衰退，我哋係其中一個！一定係蝕㗎，交租已經係一個負擔，唔係淨係交租咁簡單，仲有雜費電費都要交，一般運作嘅嘢，我哋係冇停過，變咗你都係繼續營運，但係就冇收入，就算兩、三個學生返嚟（上堂），都幫唔到好大！」
難得業主肯通融，「其實業主都叫做唔話得，喺我哋困難嘅時候，我真係頂唔順就打畀佢，我話可唔可以大家共度時艱，我可能有啲租……我係遲咗交，我希望追返啦！𠵱家我都係使緊自己『老本』，呢度一樓就交返現有租金，但係二樓，我就交一半，交下交下都唔知有冇機會交得足，如果交唔足真係要搵地方再縮小個皮費，可能變返一層都未定，退一步，海闊天空！」
演藝行業係手停口停
唐韋琪說，現在的感覺就像世界停頓了，演藝界更加是手停口停。「我哋屬於藝術界行業，好多舞蹈學校甚至我哋呢啲才藝中心，𠵱家係冇收入。演藝行業好得意，手停就口停！其實係講緊全世界，突然間好似成個世界停頓咗，但係地球行緊喎繼續，我哋嘅生命都係繼續咁燃燒！當你停咗冇收入，你生活又有問題，有病痛都需要錢去睇醫生，尤其情緒病，𠵱家有好多人困喺家，如果佢諗得唔開心，情緒會更加百上加斤！」
抗疫時代，唐韋琪說更加需要正能量加油，才可以打贏這場疫戰。要贏，唐韋琪從來勇於出戰，她當年就身經百戰連續參加了亞視的《未來偶像爭霸戰》和無綫的《新秀》。「講真我第一個歌唱比賽係《十九區業餘歌唱比賽》（1985年），學友就係《十八區》（1984年），我唱葉蒨文嘅《長夜My Love Goodnight》，冠軍係李克勤，第三名係阮兆祥。跟住第二次比賽就參加《未來偶像爭霸戰》，第一屆張立基嗰屆，但係我入唔到，屢敗屢戰呢個性格，我結果又參加《新秀》，我入到六強，但係同三甲無緣，我又再參加第三屆《未來偶像》！」當時她認識了為《未來偶像爭霸戰》當舞台形象的許愿，得他賞識簽約旗下，安排跟曾路得和杜麗莎兩位老師學唱歌。
得許愿穿針引線，1991年唐韋琪簽約寶麗金，翌年正式出道。首張唱片亦是她唯一一張大碟，主打歌是《飄戀》，但跑出的竟是卡通片《長腿叔叔》的主題曲《夢中天使》。有誰想到，一首兒歌改寫了唐韋琪的人生。「我覺得係有少少遺憾，無奈感多啲，做唔到流行歌曲歌手，做咗兒歌歌手！（兒歌天后呀！）兒歌天后係去到我做完兒童節目，後期啲人畀我嘅美譽，我覺得好欣慰。」
1994年尾，唐韋琪與寶麗金解約，當時有傳她因為不滿唱片公司力捧寶記小花湯寶如。「將我同湯寶如擺埋一齊去宣佈正式簽咗寶麗金，一齊正式出道，嗰時我哋大家用埋同一個image（造型師），所以大家都好似，都係短頭髮，有啲人誤會我哋係咪孖住一齊組合。當時《相思風雨中》係好犀利，我就plug緊《飄戀》，我覺得係公司安排，我又冇諗過話點解唔捧我呀！」
在唱片公司等工開的日子，不如主動出擊。她出席《翡翠歌星賀台慶》時遇上《新秀》好友李家強，又經他介紹獲得無綫藝員部見面的機會，「兒童組嘅監製話，我個女好鍾意《長腿叔叔》，原來係你唱㗎！我哋兒童組要人，你過唔過嚟試下，我返去考慮咗唔使兩日，我去同李蕙敏、許秋怡講，嗰時大家都好friend，佢哋兩個同我講，梗係簽啦，你𠵱家唔好等工作喇（唱片公司安排），好多嘢唔受你控制！」
我懷念以前嗰個日子
因為《長腿叔叔》帶挈，唐韋琪由《閃電傳真機》、《至NET小人類》做到《放學ICU》，一做12年，成為兒童節目元老。「我哋以前喺邵氏（清水灣片廠）一齊放食飯，大家一圍枱有傾有講，嗰啲歲月係好開心，大家好似兄弟姊妹培養咗感情；仲有一個難忘就係林家棟，佢公開喺《TVB周刊》一個專訪讚我，話我好搞笑，會令到佢有會心微笑嘅感覺，呢樣嘢我覺得有少少成就感！」她還為此，試過到飯堂找林家棟，說聲多謝。
12年的兒童節目歲月，唐韋琪曾與「認字特警」李天翔傳過緋聞，「我送好多唔同嘅人返工，咁啱我就送李天翔，同我坐埋同一架車，俾人影到相，跟住就話我哋一齊，我都唔介意嘅！」現年52歲的唐韋琪卻單身多年，「緣份呢啲嘢我又唔會去強求，𠵱家呢個時間就更加啦，𠵱家叫做『積穀防飢』，要賺返啲退休金，自己都要努力！我覺得感情喺我人生裏面就係隨緣，有就有，冇就唔強求！」
緣份很奇妙，正如有誰會想到，當年唐韋琪報名參加《新秀》時，面試試音的人是黎小田；多年以後，相逢於《流行經典50年》，為自己鋼琴伴奏的，也是黎小田。「報名大排長龍㗎嗰陣，我哋喺利舞台，真係排出街！入到去見到張衞健，佢哋試我哋音，仲有呂方，都係評判之一！」黎小田去年尾走了，唐韋琪說：「我能夠喺《流行經典50年》唱返《飄戀》呢首歌，我冇唱好耐，竟然因為呢個節目可以再唱返呢首歌，亦都係Michael黎小田同我伴奏，我覺得好微妙囉，同埋《夢中天使》都係，可以喺黎小田指揮之下，我再唱呢隻歌同大家見面！」
懷念以往在樂壇的日子？「我會懷念以前嗰個日子，但係我喺樂壇，喺流行歌曲界別唔深，但係我好懷念喺舞台上唱歌，我好enjoy舞台唱歌嘅日子！其實以前樂壇，我簽許愿嗰時，好多歌星都會去許愿同林青峰（排舞師）開設、喺九龍城嘅『星工廠』，好多唱片新人，包括現有最紅嘅歌手，都會去嗰度做舞台訓練，當時我就group埋一齊，有Echo李蕙敏、Helen（區海倫）、仲有劉文娟（夢劇院）、有Fundamental（樂隊），好多以前嘅歌手一齊受訓，我識咗好多人，草蜢都係以前同我參加《十九區》其中一個朋友，好懷念！」
老好日子令人懷念，但活在當下，未來日子要步步為營。「嚟緊呢一年真係要咬緊牙關去過呢一個疫情，再遠啲我又唔敢再諗，我覺得搞掂咗現時個現況先，要有樂觀心情面對，希望呢個時間我哋未雨綢繆，期待住好景係一定會嚟㗎！」
身處殘酷世界，有顆童心確係好緊要。
【後記】飯敍群組
畢竟入行近30年，圈中朋友人來人往，問起Vikki姐姐還有和誰誰誰聯絡、和誰見面，她總說：「我哋有個群組！」
群組人數越加越多，「本身叫『閃電傳真機群組』，越搞越大，有人改『搞大啲閃電傳真機群組』，𠵱家叫做『再搞大啲閃電傳真機群組』！」
去年《閃電傳真機》30周年，「我哋有時會圍埋一齊飯局，越搞越大型，當中有小演員啦，大個咗喇，有啲可能已經結咗婚！裏面應該有百幾人，有譚玉瑛、黎芷珊姐姐、麥包（麥長青）哥哥，仲有魯文傑、譚偉權、蔡子健、蓋世寶、張美妮……好多離開咗無綫，但情懷仲喺度！我哋嗰次揀間酒樓，已經因為呢次疫情，都結咗業喇！」
這個飯敍群組，應該最有童心。
場地提供：唐韋琪才藝訓練中心