娛樂圈不時會有不法之徒，盜用他人之名欺詐，日前郭富城經理人小美便被人冒名指公司請人，近日就有人冒劉德華公司之名疑想行騙。DJ林柏希近年兼職任餐廳宣傳工作，前晚他在fb留言道出事件始末：「話說近日有位自稱姓靳嘅先生，以『劉德華先生旗下夢造者娛樂有限公司』嘅名義，聲稱想租用我負責嘅其中一間餐廳拍《鐵探》電影版，仲話當日劉青雲、惠英紅及姜皓文都會拍攝，更叫我哋要提供埋餐廳制服作戲服，會用我哋品牌出鏡云云。基於做咗電台咁多年嘅經驗同直覺，再加上自己少少分析，我覺得呢件事非常有可疑！於是我立即聯絡姜皓文及夢造者嗰邊（因為本身係識嘅），證實根本冇呢個project，更遑論甚麼4月28日拍戲……即係假嘅！」他更附上WhatsApp對話截圖供人判斷。
提醒同業小心
林柏希續說：「我都想知呢位靳先生（佢自己聯絡商場時又自稱姓簡）乜葫蘆賣乜藥，我越聽越心寒，外行人一定會俾佢呃到。唔知係乜原因，第二日佢就拒絕咗合作，亦都冇再覆我。」林柏希坦言不知對方目的何在，只想提醒同業小心，王喜則留言：「可能係電影製作發燒友，過度投入角色箒。」《蘋果》昨日向惠英紅所屬的英皇求證，經理人霍汶希回覆表示惠英紅未有接洽相關工作。
採訪：陳杰
