武漢肺炎疫情肆虐全球，各國前線醫護需要喺資源不足，以及擔心被傳染嘅憂慮下照顧病患，實在勞苦功高。各地民眾亦發起唔同嘅方式支持，英超班霸曼聯就選擇喺主場奧脫福球場亮起極為罕見嘅藍燈，另外仲變身「NHS United」，為前線醫護打打氣。周三曼聯為對英國前線醫護作感謝，仲特登將奧脫福外非常搶眼嘅「MANCHESTER UNITED」霓虹字樣，剩係着住當中嘅「NHS」，NHS係英國國民保健（National Health Service）嘅縮寫，加上後方嘅「UNITED」，喻意同醫護連成一線，團結抗疫。同時間，為向一眾醫護致敬，球場更亮起同市死敵曼城所屬顏色嘅藍色燈，事後曼聯喺官方twitter表示「冇NHS嘅話，就唔會有曼聯」。曼聯嘅舉動亦得到唔少名宿讚賞，其中連尼加就喺個人ig上分享呢張「NHS united」相，另外加利尼維利亦喺twitter上分享帖文，仲大讚前球會做得好。