假日閒在家，無甚作為，編輯小YY個女仍然要到樓下商場補習中文一個半小時，補英文45分鐘，係單對單，口罩對口罩嗰種，補習社已經執得七七八八，補習老師食穀種，但設於有規模屋苑嘅補習社，仍然有該屋苑學生願意補習，學生留得一個得一個，好過冇，總希望捱過疫情之後，學生人數反彈。
小YY個女小小G有個傾向，就係鍾意睇英文故事書，少讀中文書，與表妹（同一幼稚園）講英語多過講廣東話，小YY驚佢中文唔掂，先至要呢位已升上小一嘅乖女補習中文。
大編輯唔抵得，搵小小G嘅小一中文課本翻閱，一睇就吃一驚，因為小一已要學習叠字、排比，邊度係小一水平？大編輯話：「唔怪得小孩子鍾意讀英文故事書，英文故事簡單易明，故事有趣味性，而中文故事書選擇極少，中文寫作水平不盡如人意，故事又比較老套，點搞呀！」英文書行銷全球，中文書只在台灣、香港出售（大陸中文故事書係簡體字，內容受調控），市場細好多，作者搵唔到食，幾難吸引文人寫小童故事書。
大編輯睇見小小G讀小一已要學習叠字，忽生感慨，想起1970年代末考會考及中大入學試，中文科都考到A，於是報讀中大中文系，點知面試時抽籤抽到面見黃維樑博士，黃博士問佢何謂叠字，叠字之應用……大編輯一時之間諗唔到，答得好差，就畀黃維樑肥咗，入唔到中大，幾乎喊咗一大場。後來痛定思痛，申請入讀浸會經濟系，得咗，於是跟鄧樹雄、曾澍基、梁海國、胡敦靄等老師學習，畢業後投身傳媒做財經記者，因文筆了得，經濟又熟，於是一路升職，最後成為財經大報總編輯，離開報界後以自由身身份為不少工商機構編撰書本，如果當年黃維樑唔係肥咗佢，順利入讀中大中文系，現在會係點模樣？難估，此乃塞翁失馬，焉知非福，一次挫折，唔好睇成好嚴重。
小YY又有焉知非福嘅事。3月上旬佢與老公到英國旅行，話明要睇利物浦對般尼茅夫，歐聯賽對馬體會，兩人遊樂之餘，睇咗般尼茅夫嗰場，好期待睇馬體會。點知道價錢昂貴之歐聯球票（網購），本由UPS速遞到倫敦地址（朋友家），竟然失蹤，不知去向，向UPS追討，對方話唔知原因，有待調查，不肯負責任。兩人激氣之餘，提早返倫敦，3月12日清早返到香港，嗰陣時仲未需要自我隔離14天，唉吔吔，之後自英國回港學生疫情大爆發，至今過千宗香港確診，近60%與留學生及外遊有關，上星期又睇到利物浦對馬體會場波，因有3000名西班牙球迷入場，後來發現大量確診，連名宿杜格列殊亦中招，小YY不禁嚇了一驚，亦慶幸與老公走得快，好世界，唔見球票唔見錢，固然失望之至，但亦可能係上天祝福也。