自從冬季轉會窗曼聯簽入好波之人波基斯費南迪斯（B費）後，佢嘅表現令魔迷幾乎忘記另一位貴價中場保羅普巴。近日B費接受曼聯官網訪問嗰陣就提及養緊傷嘅普巴：「大家都知道佢嘅質素，期望更高係好正常，我希望球隊保持到現時咁好嘅狀態，等大家對佢有更多耐性，畀時間佢克服傷患。」自普巴由祖雲達斯回歸，魔迷都希佢能夠帶起隊波，可惜佢同前領隊摩連奴嘅關係同埋傷患，令佢近季踢唔出水準，相反B費加盟短短三個月就得到認同，大有取代對方之勢，佢就趁機為普巴辯護，話佢同C朗、美斯一樣可以用一己之力改變戰局，相信唔少魔迷期待聯賽重開後睇到佢哋同場合作嘅場面。