車路士守將列斯占士近日喺ig上載咗一張細路時喺車路士青年軍嘅相，圖中六個細路同一個大哥哥合照，呢六個細路當中包括占士在內共有三個今季喺英超經已站穩陣腳，大家又認唔認得呢？左一嗰位就係占士本人、左三就係美臣蒙特，佢哋今季都係車仔嘅主力球員，至於右二嗰位都係喺英超踢出名堂嘅球員，但就並唔係喺車路士上位，而係轉投咗另一間倫敦球會韋斯咸嘅防中迪格蘭賴斯喇。值得一提嘅係，當時企中間嗰位年輕球員，其實係阿根廷前鋒迪山度，佢喺2008年獲提升上一隊，但表現一般翌季就被外借咗去布力般流浪，之後轉投咗德甲雲達不來梅同史浩克04後嘅表現就唔錯，今年31歲嘅佢已經回歸咗南美，目前正效力巴甲嘅明尼路。