4月12日跑馬日有許冠傑網上演唱會，轟動全港，歌神為通利琴行已失業之音樂會製作部員工度過「寒冬」，義務演唱並捐錢，認真有義氣，令人感動，令人知道乜嘢叫做雪中送炭，而唔係好似一啲所謂影星咁，只識到北京kiss ass，真正香港人應記住。
當日晚上，大編輯轉發一篇長文，作者蕭潮順，香港之音樂會、演唱會、大盛事之製作天王是也。蕭仔有乜嘢講？原來係說明清楚許冠傑義唱之來龍去脈，題目就叫做「寫在2020許冠傑同舟共唱演唱會前夕，感謝您，葉潔馨的初心」，原文甚長，主要係講述呢個演唱會牽涉到版權、場地、製作、寬頻光纖、全球轉播、YouTube、fb等等複雜技術問題，一個星期內搞定，全靠各方人士義助及葉潔馨施展渾身解數，用超廣闊人脈網絡，先至可以辦妥呢場哄動性演唱會。蕭仔當然有極大貢獻，但不忘多謝港大、英華（許冠傑母校），浸大（蕭仔，阿旦母校），聖保羅書院（阿旦母校）主動幫忙，旅發局、騰訊、香港寬頻，fb，YouTube及眾圈內及圈外人士，包括羅燦，馬榮成、錢大康、黎智英……等人，名單太長，不能盡錄。
蕭仔講到網上健康旦及許冠傑音樂會全球直播，皆出於葉潔馨之預見力，及振臂一呼，各方響應。葉潔馨Kitty有公關大姐大之稱，在中大崇基一畢業就做TVB編導監製，與中大同學許冠文及許冠傑炮製「雙星報喜」（編導梁淑怡，吳慧萍，副編導葉潔馨，編劇鄧偉雄，劉天賜等），係1970年代初最受歡迎電視節目之一。有此淵源，此外還有「狂潮」、「家變」哄動全港，有此背景，Kitty如持有武林聖火令，人人畀面。
許冠傑吸引力非凡，連林鄭都要抽水，林鄭抽水之餘，其實都要諗吓，疫情當前，人人都要閉關之餘，政府有乜招數可以令市民散散心，解解悶？點解葉潔馨諗到嘅招數，兩局長劉江華及邱騰華都烏垂垂，形同腦塞？1967年港英政府都想得出搵許冠傑、泰迪羅賓、Checkmates等十幾二十歲歌手在卜公碼頭開演唱會，全港不知幾多中學生（包括左丁山）湧去聽歌。現在係21世紀嘞，又有禁聚令，Kitty、蕭仔等人腦筋轉得快，立即諗出網上音樂會，而歌手仍然是許冠傑，應咗一句：老兵不死！Kitty如要再搞下一次，不如試吓陳奕迅、張敬軒等，等政府辦就如等待果陀啫。