強國網軍小粉紅「出征」泰國，結果兵敗如山倒，呢場中泰大戰，香港網民有份幫拖，但唔算係主要戰力，不過強國黨媒就唔係咁睇，官方喉舌「環球網」近日發表評論，輕輕帶過強國網軍嘅所作所為，同時示範割席，聲言大戰冇涉及「小粉紅」同「帝吧」，仲爆內幕消息話帝吧由始至終冇參戰，仲話帝吧一直呼籲網友冷靜，珍惜中泰關係喎！可憐五毛網軍就咁淪為condom。
搵泰版777拍片等捱轟
同一時間，黨媒就將連登巴絲同HZF拉落水，話成場罵戰係HZF做背後「大台」連發多條Tweet搞起，而連登巴絲就同台灣網軍扮泰國人攻擊強國。HZF係邊個？經過八方破譯，原來就係黃之鋒囉。雖然佢無辜咁躺着中槍，但HZF似乎不以為意，出帖自嘲之餘，仲分析話原來國際戰線比拼軟實力，可以用種咁嘅方式呈現，似乎佢已經發現國際戰線，又有新戰場可以開發喎。一眾連登仔亦寸黨媒，有連登仔話，就當係連登仔扮：「係咪台網軍+連登仔逼你（中國網民）去X泰國人？」仲有連登仔恥笑官媒：「遲啲美國總統都話係連登仔扮」！
不過呢場仗應該冇咁快落幕，因為力銷中泰一家親嘅強國，最新力作係由國家廣電總局同公共外交協會出手，搵埋成龍、楊冪、馮紹峰、周迅等明星同一班泰國各界人士，攜手拍片打氣，片中泰國總理巴育仲要振臂一呼話：「風雨同舟，攜手共進」，但呢條片去到泰國，應該都只會有反效果，因為巴育喺泰國民望堪比香港777，而泰國人亦發起緊第二波攻勢，不滿強國截斷湄公河上游，於是用「#StopMekongDam」標籤呼籲國際關注，試問有咩家人，會親到斷你水源先？
李八方