武漢肺炎自一月在香港爆發，教育局在農曆新年假期後宣佈因疫情停課，三月底更推出「限聚令」封閉所有康體設施。同時，疫情蔓延全球，幾乎各國體壇也陷入停擺。對於浸信會永隆中學16歲的女籃後衞陳樂如而言，疫情令學界賽季被腰斬，國際籃協（FIBA）的U16亞錦賽取消，這位中五生有感整個學年遭這場「庚子大疫」偷走 ，全年只剩一片空白。
記者/攝影：許嘉明
本港自去年六月起社會運動不絕，香港學界體育聯會多次在網上發出公告，「基於不明朗因素，以及顧及參加者安全問題」而取消賽事。好不容易等到局勢稍為緩和，港九區D1籃球在今年1月中旬「開快車」並在1周內完成決賽，惟新界仍有多區未能決出冠軍。隨着疫情越趨嚴重，學體會在3月3日宣佈腰斬賽季，樂如在今年屯門區女子A grade只完成三場分組賽，球季在沒有響起完場哨聲的情況下，戛然而止。香港在2003年爆發沙士，但疫情在暑假前受控，世衞在該年六月正式剔除香港疫區之名，同年10月出生的樂如未曾經歷沙士，她也坦承從未想過生活會受到疫情影響：「沙士係前車之鑒，香港正常對疫情有預防（措施），我冇諗過今年學界都係打咗三場就完咗。」
一夜間冇晒人生目標
永隆女籃在18/19球季創校史贏得精英賽季軍，惟今季陣容大變，主力中鋒「高妹」黃惠婷畢業離隊，得分好手關海珮則轉校至協恩中學，樂如原本希望今年領軍再闖精英賽力證身價，即使在停課初期仍跟教練林碧怡在街場鍛煉個人技術，希望增值自己。可惜疫情下所有學界賽事取消，樂如也慨嘆可惜：「高妹同海珮離開，對永隆係好大打擊。我喺中一到中四打精英賽，每年都有高妹鎮守籃底，唔需要擔心籃板，有海珮又唔使擔心衝搶同得分。不過我都會諗，如果冇咗佢哋，我會唔會帶領到隊波呢？」
得悉學界賽季提早完結，樂如坦承當下覺得晴天霹靂：「對中學生嚟講，學界真係好重要。」每個人對校園生活各有詮釋，有人埋首讀書、有人熱衷社際及班際活動、甚至有些人對學校沒太多感情。對樂如而言，中學的校園生活早已跟籃球劃上等號，「聖誕聯歡會撞精英賽，假期要練波，放學又係練波，我喺學校都係同女籃班人玩。對其他人嚟講，校園生活可能只係陸運會之類，做啲嘢唔會話好多元化。」即使旁人或會覺得晨操晚練的日子極度枯燥，但樂如依然樂在其中：「如果冇咗籃球，我一定唔會有𠵱家咁多姿多采嘅生活。」
疫情下，康文署轄下體育館、戶外硬地球場及健身室等康體設施全數關閉，樂如的生活也被扭轉：「我升上中學以來，都未試過有咁長時間休息，因好多時都要練波。𠵱家冇波練，比賽又停晒，成個人好似好空虛。」不能練習，留在家中也好像變得無所事事：「你唔可以出街，費事傳染人或者俾人傳染。你留喺屋企又冇理由拍波，會嘈親人，連街場都封埋，我真係唔知有咩可以做。」
為赴澳戰亞錦賽做兼職
從社會運動到武肺，樂如估計上學期（去年9月至今年1月）實際上課日子不足2個月。因為疫情，校園時光像上了鎖，樂如有感中五這一年像被武漢肺炎偷走：「始終時間冇咗就係冇咗，學界取消咗就係取消咗。之前話延期，你都仲可以等，但講埋取消，亞錦賽又取消埋，所有嘢都冇晒，好似呢一年係白過咁。」她續指：「可能你淨係講得出2020年有肺炎，但唔會講得出有咩經歷過。」樂如表示已減少外出避免受感染，人際關係也變得疏離：「你冇可能同朋友咁多接觸。𠵱家驚有事，又唔可以成日上人屋企，驚帶啲病毒上人屋企。」
除了「學界四大賽」取消，身為港青代表隊的樂如，原本在本月10日出征澳洲出戰亞錦賽，惟賽事同告取消，對樂如而言無疑是雙重打擊。她表示自己不曾去過「袋鼠國」，本身很期待跟一班同為03年出生的隊友出國，甚至為減輕家中經濟負擔，早前曾當兼職賺旅費：「𠵱家好多人失業，我屋企人都少咗嘢做，冇理由因我去澳洲而令佢哋咁大負擔，自己都出嚟（做兼職）幫補吓。」這班U16小將在三月仍有到街場打球及到石硤尾公園體育館外跑斜坡練體能，但當樂如獲悉賽事取消後失望得落淚：「好突然。一朝瞓醒覺，就話因疫情而取消今次亞錦賽。好似有個目標畀你追，然後乜都冇晒。」
或重讀一年再考DSE
這場武肺令過去一切的理所當然，現在也變得蕩然無存。不論籃球或學業，樂如無奈指出只能繼續等待：「以前每一日都返學，唔會突然成個月都唔使返學。由一月停到𠵱家，都差唔多停咗2、3個月，仲長過暑假。好似成年都喺度等待緊唔知咩，好想疫情快啲完結。」以往中五生下學期已開始準備文憑試（DSE）及升學計劃，但停課下，中五這年學過甚麼？樂如也說不清楚。「𠵱家雖冇學返，但啲功課多到七日喺屋企都應付唔到。因你冇上堂聽過就唔明老師想要咩，好多嘢都甩晒。」只靠網上教學，難以令樂如明白課程內容，她更擔心以此狀態無法應付明年的DSE：「如果疫情一路嚴重，九月都未必開到學。」她補充，與其在準備不足情況下考公開試，倒不如重讀一年裝備自己。
珍惜熱血打波的隊友
樂如不諱言此刻讀書也為順利升學，延續自己籃球夢：「有時返學嘅目標，就係為咗打籃球。因為你唔返學就冇波打，同埋學生運動員嘅首要身份係學生，都要讀書。」這位中五射手異常眼淺，但籃球卻令她找到自信並變得堅強：「假如冇咗籃球，我一定好頹廢，同埋零目標。」樂如表示，希望大學能升讀體育相關的學系，「因為想讀番自己鍾意嘅嘢。」大專院校設有運動員獎學金計劃，雖然亞錦賽因疫情取消，但樂如已入選香港代表隊大單名單，故其港青資格應獲認可。
縱使一切計劃被疫情打亂，但接二連三的打擊卻未有削弱樂如對籃球的熱誠：「當你踏足社會，可能唔會有一班人同你咁熱血打波。好似練U16咁，大家口講『好攰，唔想練』，但落到場，大家會提起精神做足每樣嘢，就算俾人鬧都好，都會認真聽教練講嘢。」2020年，像是個福禍難料的年份，但樂如對籃球不服輸的精神，對應付疫情同樣有效。