武漢肺炎疫情搞到波踢唔到，球員又個個要喺屋企隔離，但佢哋又睇落唔係咁悶，皆因間中ig就會見到佢哋放片又放相，一時晒天倫樂，一時又參加好多唔同種類嘅home challenge，好似疫情期間一直喺葡萄牙家鄉隔離嘅基斯坦奴朗拿度（C朗）一家，就零舍多搞作。
小島租金每周三萬
女友佐真娜早前先被C朗捉去跑步，仲要跑上斜路，結果被一向弗爆嘅呢位球星男友操到喘晒氣，可能因為呢期成日一齊操，身形都越嚟越好，周三趁住C朗去咗母會國民隊新開嘅博物館參觀，佢就喺ig派福利，大晒自己着上鮮艷紅色胸圍喺海邊曬太陽嘅相。佐真娜身材好大家都知道，以前都會喺ig放唔少賣大包嘅靚相上去，搞到好多男士睇完血脈沸騰，今次仲要着住呢件紅bra，瞓喺海灘一片草地上自拍，而且半身相影上去，上圍零舍突出；正好因為C朗呢日返咗母會國民隊啱啱開幕嘅博物館，悶悶地就自己出ig放索相。
C朗同佐真娜因為太受傳媒關注，經常被傳媒偷拍，所以一家人就離開咗原本住緊嘅豪宅，搬咗入葡萄牙馬德拉島一個相對僻靜嘅漁村，但講緊每個禮拜都要畀33,000港紙租金，呢啲散銀對C朗當然一啲問題都冇，最緊要係冇人騷擾到自己同屋企人，而且可以享受陽光與海灘，聽落都幾正！所以話就話隔離，C朗一家呢段時間都幾咁精采，尤其佢本人喺呢一個半月，放相好似仲密過平時踢緊波。
C朗見證兒時威水史
講番C朗去咗參觀母會嘅博物館，身穿運動服嘅佢被球迷發現面上多咗好多鬍鬚，唔知係咪想留到好似美斯咁。佢ig就話今次返母會，就好似返屋企一樣，而國民隊亦有喺官方ig提到C朗返嚟，話佢見到好多之前細個時嘅捧盃相，亦有喺榮譽冊上簽名留念。
C朗過得咁開心，佢班祖雲達斯隊友、首兩名確診武肺嘅魯加尼同馬度迪，經過居家隔離同治療後都重新進行病毒覆檢，結果係陰性總算大步檻過。祖記份聲明中就冇提到另一位中招嘅保羅戴巴拿，不過呢位靚仔球星早前喺ig直播提到自己同女友嘅情況已經有好轉，只係等緊檢測結果，而且三日前先喺屋企操過嚟，睇嚟好快會康復，叫大家唔使擔心。