疫情下中超聯賽開季無期，但波未開就已有球員冇埋份工。講緊嘅係廣州恒大嘅中國國腳于漢超，佢日前被發現公然喺街塗改車牌，意圖避開當地嘅「禁駛令」，最終呢位33歲老將唔單止俾廣州公安行政拘留15日兼罰款扣分，所屬球會廣州恒大更隨即炒魷！
近日內地網絡流傳出于漢超嘅犯罪短片，見到佢當街將自己部車嘅車牌由「E」塗改成「F」，企圖避開廣州市限制非廣州車牌「開四停四」，即係同一部車連續行駛四日之後就要停駛四日嘅規例。講真大陸城市周圍都係天眼，于漢超仲要喺街邊犯法，點會走得甩？廣州交警周二就宣佈于漢超已經接受調查，並將會向佢罰款5,000蚊人民幣、扣12分兼行政拘留15日，為咗貪一時方便搞成咁都幾符合國情，但于漢超唔單止被罰款兼行政拘留，廣州恒大同日宣佈佢因為違法，予以開除處分。
恒大重典治軍有前科
其實恒大都經常罰球員，另一位中國國腳韋世豪之前就曾經因為粗野攔截對手同態度欠佳，兩度俾球會罰款同停賽；曾經效力恒大嘅阿根廷中場孔卡亦都因為同教練爭執而被重罰100萬人民幣同停賽9場。而巴西中場費南多喺今年二月就因為拒絕聽從教練指示，俾球會罰款300萬人民幣，成為咗中超最高金額嘅罰款，不過于漢超今次被開除就成為咗恒大最嚴重嘅處罰案例。現年33歲嘅于漢超近年因為傷患，加上教練簡拿華路又重用年輕球員，佢開始淡出恒大嘅主力陣容，上季只係上陣過六次。不過佢依然係國足常客，上年年初嘅亞洲盃亦有入選。
年薪1,500萬人仔
據報仍然有多支中超球隊向佢拋出橄欖枝，包括佢嘅家鄉球隊大連人。其他球隊係咪可以免費簽走于漢超仲係未知數，事關內地球員合約條款相當複雜，原本于漢超同恆大仲有兩年約，年薪為稅後1,500萬人仔左右，但據中國足協最新規定，國內球員稅前年薪上限係1,000萬，實收500萬左右，以佢同恒大原本仲有兩年約，就有約2,000萬元損失，呢筆錢夠喺上海買兩間屋。
有人愁時亦有人歡喜，效力山東魯能嘅前曼聯中場費蘭尼戰勝武漢肺炎後，出院第一件事就係喺佢留醫嘅山東濟南醫院門前留倩影。之後佢將呢張相放上佢ig，相中見佢同四位醫護合照，仲送上金色簽名足球，留言話由心底裏流露對醫院同球會嘅感激之情，其實佢知唔知呢隻病毒係邊度嚟呢？似乎人民幣真係好重要喎。