賭王何鴻燊三房千金何超蓮（Laurinda），防疫時期乖乖留家，速變宅女中毒，天天玩電話、打機、煲《屍戰朝鮮》。平日管理的澳洲酒店租給當地政府做隔離中心，慈善組織繼續向基層派防疫用品，她的牛肉麵生意則月月狂蝕錢，「我喊喇，大家以為賭王千金有好多水射住，其實唔係，嗰啲真係我啲錢嚟㗎。冇人知幾時打贏呢場仗，希望一齊守住啦！」 總之，樂觀面對。
撰文：林妙萍
拍攝：郭賢興
造型：陳蔚渝
服裝提供：Ganni、By Far、Boyy、Studio Amelia（Lane Crawford）
場地提供：ISOLA（ifc）
何超蓮日前在中環做訪問時消瘦了不少，宅在家沒事忙竟然越來越瘦？「可能媽咪整嘅嘢食太健康，所以瘦咗。」訪問期間，超蓮拎住Samsung Galaxy Z Flip新摺機玩自拍，原來她煲劇、打機全部用手機，「平時唔興煲劇，呢排煲咗好多，《Kingdom 》（屍戰朝鮮）好好睇呀，我兩日煲晒。」更自爆中了game毒，「我從來未試過玩網上遊戲，以前都係玩嗰啲數獨、Candy Crush，所以一開始咗，就好鬼addicted。Game叫《忍者必須死 》，死喇，講咗㖭，我好驚大家知我玩緊，個忍者要升級，咁一路升級你就會越嚟越勁。」
想留地舖
有閒情可以打機，因為疫情影響所有人，超蓮前年投資開設的牛肉麵店，原本進軍內地開加盟店的計劃要暫停，香港兩間店也日日燒銀紙，花盡腦汁推出牛肉麵、手工水餃外賣，但難以力挽狂瀾。「其實每個月都蝕緊錢，我喊喇！大家以為賭王千金有好多水射住，其實唔係，嗰啲真係我啲錢嚟㗎。」賭王千金都蝕到喊，「我有一間街舖，一間商場舖，街舖業主好好，肯減租。」旺角的商場舖大業主不肯減租，「嗰間係香港最好市時簽嘅合約，租金都係天價，都未正式做到生意就變晒喇。地舖嗰間，就算負數都想做落去，都諗緊辦法，希望守得住啦。」
至於超蓮管理的澳洲酒店，則將部份房間租給當地政府做隔離人士酒店，幫手抗疫，「香港呢面畀咗好多防疫資訊，所以澳洲酒店嗰面可以提早做定準備點應變，所以影響減低咗。我發覺呢段留家防疫時間最大得着，係原來好多會議係唔使一定要見面開，電話會議好方便，仲可以開得密啲，有乜即刻解決。」
真情爆發
別人眼中的超蓮，經常開心大笑，她剖白只有對住家人尤其對住弟弟猷啟，才會真性情爆發，「我覺得我情商幾高嘅，我唔會歇斯底里咁爆，係好金牛座嘅人，但就唔好觸碰到我嘅底線囉，一掂到我嘅底線呢，我唔會癲，但我會turn away，我唔會畀任何機會你，我會走，一刀切！」甜美外表都有剛烈一面，不常流淚，「我啲情緒係好容易就過嘅，唔會憂鬱好耐嗰啲人，我直頭唔會帶去下一個鐘，打畀朋友講個電話就冇事。」
關於28歲典型金牛女
Q：最怕哪個星座的朋友？
L：雙魚座。因為雙魚座同金牛座唔係好夾，一個好理性，一個好感性，好難處理雙魚座。
Q：吃過最難食的東西？
L：Marmite（馬麥醬），好難食，唔識形容係乜嘢味，藥味。
Q：最想推介的一首歌？
L：咁我要幫鄧小姐推介下，《很久以後》。
Q：睇得最多次數的電影？
L：近期係咁睇周星馳啲戲，《唐伯虎點秋香》。
Q：人生必去的地方？
L：去睇safari，動物大遷徙。
Q：手機內存有幾多張相？
L：好多，2萬3千張，我係由好舊嘅2009年開始儲。
Q：請用一種食品來形容自己。
L：糖！因為我好甜，哈哈哈哈，係咪想嘔呀？
細細部得歡心
手提電話已經成為日常生活的必需品，超蓮玩的摺叠式智能手機，是潮機Samsung Galaxy Z Flip，時尚外形夠前衞，摺叠時體積細小，更和Thom Browne玩聯乘。上月一推出便深得眾明星、潮人熱捧，台灣天后蔡依林、香港天后容祖兒、韓國女歌手Sandara等，個個都一機在手。而韓劇更植入手機，包括朴叙俊的人氣劇《梨泰院Class》和秀英扮演女警的《如實陳述》。
