早前有傳前財政司司長曾俊華、前立法會主席曾鈺成同埋自由黨榮譽主席田北俊呢三位JT可能有搞作，甚至傳佢哋組黨，但一直得個吹字。千呼萬喚，3JT噚日終於「合體」，喺街頭派口罩。
有中環人噚日行過華人行見到三JT派口罩。根據現場消息所講，3JT一共派咗2,000包、每包20個、印有「給香港一個希望HOPE FOR HONG KONG」嘅口罩，下午1時35分已派晒。雖然有口罩派，但現場秩序大致良好，不過都唔少人攞。
其實田少已經用「給香港一個希望HOPE FOR HONG KONG」名義派過一次口罩，今次又聯合兩JT行動。噚日又係中共嘅「全民國家安全教育日」，曾主席做召集人嗰檔「香港願景計劃」都有個網上相關研討會，之但係佢都走去派口罩，真係相當有意思，事關連人嘅健康都保障唔到，仲講乜國家安全？