今日「安心事件」一周年，《蘋果》上年獨家爆出許志安（安仔）同黃心穎車廂偷情，猴擒黃心穎先隔住口罩親吻安仔，之後除罩埋身攬啜，安仔隻手緊貼心穎大腿上。佢哋又十指緊扣由大坑至鯉魚門短短十多分鐘車程，連環親吻近20次，幾乎都由心穎做主導。恰巧前晚重播嘅劇集《On Call 36小時II》，就播到心穎同馬國明邂逅嘅一幕，似係為「安心偷食」一周年贈興。而心穎噚日對事件一周年咁樣講：「這一年發生太多事，變化太大。」
黃心穎、許志安喺今日「安心事件」一周年，何去何從呢？黃心穎以短訊回覆：「這一年發生太多事，變化太大，希望一切盡快回復常態，大家平安。多謝關心（合十emoji）」。
心穎約泥鯭行街
回顧安心事發後，心穎事後潛水八個月到美國生活，至上年12月高調返港，喺機場受訪時直指：「冇諗過轉行」，回歸後心穎喺Ig好活躍，經常post相留言，不乏身穿bra top露腰趴地性感照、亦有床上自拍照，而近期出現最多嘅相，除咗寵物唐狗，仲會抱住姨甥女合照，擺明想營造正面形象。不過始終寂寞難耐，今年2月被爆同樂隊RubberBand鼓手泥鯭到寵物店買嘢而傳緋聞。
另一邊廂，偷食事件後，安仔同心穎都形象破產，安仔公開聲淚俱下向太太鄭秀文（Sammi）道歉，做個有承擔男人，得到Sammi原諒。過去一年Sammi如常工作，近期又參與落區派口罩活動，相反安仔全面停工閉關，不過疫情之下，近日佢鮮有低調出動，孖好友蘇永康參與慈善機構嘅派飯同派發口罩活動。
馬國明傳戀詩詠
心穎對娛樂圈念念不忘，遭無綫投閒置散，惟有主動出擊，自我宣傳，主演《牛下女高音》尾聲三度更新Ig多謝劇組，可惜遭網民圍剿。另一被牽扯主角馬國明繼續生活工作劇接劇，早前有傳馬國明同唐詩詠撻着，甚至有傳女方大肚，經手人係馬國明，不過佢哋已否認。
撰文：卓寶花
心穎美國遊大埠
安仔Sammi打唔甩
