對於唔少曼聯球迷嚟講，當年碧咸同傑斯雙翼齊飛嘅畫面依然叫人懷念。近日傑斯喺天空體育一個節目中表示，就喺碧咸2003年離開曼聯轉投皇家馬德里嘅同時，其實佢都有機會離隊轉投國際米蘭。不過，最終因為碧咸決定離開，令傑斯最終成功留隊，成為傳奇般的「one club man」。記得03年爆出震驚球壇嘅「飛砵事件」，其時曼聯領隊費格遜喺更衣室踢波砵飛中碧咸塊面，令其俊俏臉孔留下明顯疤痕，一直有指事件為碧咸離隊嘅主要原因。不過傑斯近期大爆，02/03球季碧咸盛傳離隊嘅同時，自己亦有可能離隊，「當年有人話我有可能轉投國際米蘭，其實我一直未有聽到相關嘅資訊，的確當季我亦唔喺狀態。」傑斯就話當時球隊有種論調，就係佢同碧咸之中有一個將會離開紅魔，「最終大衛離隊，而嗰一次係我最接近離開球隊嘅機會。」節目主持人加歷查就問傑斯有冇諗過離隊，而傑斯就話佢從來冇打算過離開紅魔，反而認為幫助球隊贏得聯賽冠軍就係佢最大嘅挑戰。
另一邊廂萬人迷碧咸近日繼續行善，日前佢就去咗牛津郡探訪一位患癌嘅70歲利物浦球迷羅伯斯。昔日紅魔名將同死對頭球會嘅死忠碰頭，兩人完全冇芥蒂，傾咗好多關於英國足球嘅嘢，碧咸仲話紅軍今季嘅表現好好值得贏英超冠軍，難怪羅伯斯都大讚碧咸好人兼可愛，邊個話曼聯同利物浦一定係勢不兩立？