4月12日有馬跑，馬迷唔入得場，左丁山有一隻團體馬出賽，團體經理可以訂一張4人枱在馬主廂房，問左丁山入唔入場，入到場都唔落得沙圈，即使贏出頭馬，又冇咗影相環節，諗落冇癮，在家睇電視捧場便是，因此推咗。自從馬會於疫情當前，仍致力維持賽馬以來，以極謹慎、嚴肅態度維持閉門賽馬，一啲意外／不愉快事件都冇發生，馬會管理層值得一讚，左丁山身為馬主馬迷，冇癮只是小事一宗，要睇大局。例如呢個復活節假期，左丁山自4月9日上午10時半辦完公事回家之後，至到4月13日星期一晚上床瞓覺，一共有104小時留在家裏唔出街，只係落街及去馬會食飯用咗接近4小時，睇電視見到淺水灣沙灘、赤柱西貢及長洲逼到爆，人潮洶湧，心都驚晒。難得每日確診在4月12日跌到得4宗，三位是外遊回港人士，希望大家小心注意本地群體傳染呀。
在家投注，照例輸錢，未到五點，已有不少短訊傳來，驚死左丁山唔知，話歌神許冠傑網上直播個人獨唱，為香港人打氣。太太二話不說，不再睇跑馬，入房打開手機睇「健康旦」直播，吩咐落：「尾場幫我買1號、14號單Q（即莫雷拉、田泰安單Q）。」左丁山不以為意，同佢落咗注先，自己就買1、 3、 4、 8四重彩，點知真係跑出14、 1、 3、8，4號（最合拍）不見了，為之暈得陣，唔聽老婆話，果然冇發達。
老婆話許冠傑雖然係我哋一輩（1967年到卜公碼頭睇The Lotus，Teddy Robin and the Playboys音樂會一輩），但對香港人極有吸引力，此次義務開演唱會，點都要捧場。次日蘋果日報報導255萬人睇直播，證明阿Sam係香港icon。將蘋果報導轉發去台灣畀一位「避疫港人」睇，點知佢迅速回覆：「手機開唔到，我唔係訂戶」，日費咁便宜都唔係訂戶，老友回覆：「登記手續麻煩吖嘛！」想起當初自己成為訂戶，都唔識搞，畀肥仔K幫手上網登記。呢日好彩嘞，蘋果有一大版廣告教人用新方法訂閱蘋果動新聞，手續話咁易，科技盲左丁山一睇都知道點辦，於是呢次唔網上轉發，而係用手機影張蘋果A3版廣告，傳過去畀台灣老友，一小時後，佢再WhatsApp過嚟：「果然幾方便，登記訂閱一年嘞，483.8元一年，即係每日一個三毫二，紙巾都買唔到。」網上訂閱，最緊要user friendly，讓讀者輕鬆，唔好麻煩，Apple手機賣得，就係因為太容易操作，80歲老爺都識之故。Apple Daily引以為鑑，應將訂閱及付費手續設計到最輕易，不扮高深，只求簡易。香港報紙／網媒今天逐漸傾向北京，唔靠攏就少廣告，有人在蘋果賣廣告，說功效好好，正想繼續，就收到電話去食飯，食完就抽，抽乜，抽蘋果廣告囉，原來日日有人專心數蘋果有幾多版廣告，數廣告者是誰，係有目的㗎。大家唔訂閱蘋果動新聞，香港會滅聲，諗吓都打冷震！