西環一早講明今年9月立會選舉不容有失，早前已向建制組織捽數，要交選民登記人頭，不過要吸引人做選民登記，蛇齋餅糭又點少得？不過唔知係咪武漢肺炎疫情影響中共經濟，令維穩費縮水，有建制組織竟然想用三個口罩就叫人畀個選民登記佢，有冇寒酸成咁？
職員認要「交數」
話說職工盟主席吳敏兒收到張朋友傳畀佢嘅相，顯示「香港東莞橫瀝同鄉會有限公司」信封裝有口罩同紙條，話會員填妥及寄回夾附嘅選民登記表，就可額外獲得五個口罩，咁《蘋果》記者扮係會員打去問，對方職員承認，但就話原定派五個口罩，但因登記人數過多，所以只能每人派三個！
呢個職員仲認埋收集到選民登記表係因為佢哋有個quota，「叫做乜呢……要交數囉」，記者追問何謂「交數」，他承認「交數」係選民登記嘅人數，但之後又話到時你哋選乜都冇乜所謂，可以自由選擇㗎！
吳敏兒話呢個同鄉會一睇就知係建制組織，只係用抗疫做幌子收集市民個人資料。佢又質疑若要推動選民登記，點解要用口罩嚟換？八方都提醒市民，如果因為口罩交選民登記資料畀第三者，當中涉及私隱問題，仲要唔知人點用你嘅個人資料，市民真係要諗清楚背後嘅風險，值唔值得為三個口罩咁做？
李八方