球壇疫情近排有緩和迹象，唔少確診球員都陸續好番，其中效力山東魯能嘅前曼聯球星費蘭尼，上月22號確診武漢肺炎後，成為首位以及唯一確診嘅中超球員。據報32歲嘅費蘭尼屬於無症狀感染者，體溫正常，確診後一直喺山東濟南醫院留醫，經過大半個月治療之後，山東魯能禮拜二就喺微博證實，呢位比利時球星經專家組評估後已康復出院，進行自我隔離14日之後就可以歸隊。費蘭尼上月底從新加坡返中國，曾出現喺上海浦東國際機場、上海虹橋火車站等地點，之後接受病毒檢測後發現呈陽性，但據報費蘭尼嘅病情一直都唔算太嚴重，治療期間仲可以自我訓練，得閒嗰陣仲會拍影片同煲劇消磨時間呢！