【西灣河】現年39歲的姚子羚去年爆出撻着夜店前高層兼失婚的楊偉文（Raymond），原來男方一腳踏三船，慘成「三奶」的姚子羚即「斬纜」宣佈跟Raymond分手做回朋友。但繼上月被目睹約會後，《蘋果》日前又目擊姚子羚跟Raymond鬼祟食晏，密密見面，難怪兩人被懷疑是假分手，女方更擺明出盡力箍實Raymond免被搶走。
姚子羚去年5月被《蘋果》獨家爆戀上Dragon-i前董事、失婚的楊偉文，更有床照流出，但男方隨即被踢爆疑似一腳踏三船，先跟藝人前妻蔡宛珊關係拖拖拉拉，又陪圈外「二奶」在新年睇煙花，接着再跟姚子羚蜜遊泰國。爆出四角關係後，姚子羚第一時間宣佈跟Raymond分手做回朋友。
全程戴口罩
不過上月姚子羚被傳媒目睹跟Raymond約會，《蘋果》日前又再目擊兩人鬼祟食晏，同行還有疑似男方媽咪。姚子羚和Raymond見得如此頻密根本儼如情侶一樣，難怪外界推測兩人根本講大話假分手，實則轉玩地下情。日前下午5時許，《蘋果》記者在西灣河鯉景灣見到Raymond先將白色Benz停泊在路邊，原來姚子羚早已在車內，她先落車進入附近一間西餐廳，會合在內的一位疑是Raymond媽咪的auntie，Raymond則在門外「煲煙」後才進入餐廳。一身黑衫、黑褲、黑帽的姚子羚全程表現得相當小心，雖然是在餐廳內，但她全程皆戴着口罩不吃不喝，似乎是擔心被人認出，多過怕武漢肺炎。
約一小時後，三人埋單離開餐廳，Raymond步出發現座駕被警察抄牌，不發一言便拿起告票。姚子羚與auntie邊行邊傾緊隨其後，兩人表現得非常投契，十足奶奶跟新抱一樣，姚子羚二話不說坐在副駕位置，而auntie則識趣坐在後座。
Raymond先送auntie回他寓所附近，之後再送姚子羚經東隧去將軍澳，沿途兩人疑似發現被傳媒追訪，行車時快時慢，最後在清水灣半島附近成功撇甩記者。事後向姚子羚求證是否與Raymond復合，她回覆傳媒時說：「只係同朋友食午餐，感情事唔回應啦，想專心工作，多謝大家關心。」
月內聚兩次
姚子羚跟Raymond除了日前在鯉景灣食晏外，上月中兩人被傳媒影到一同飯敍，一個月內被影到兩次約會，足見二人關係非淺，不過當時姚子羚同樣例牌否認復合，稱只是跟Raymond同場出席朋友聚會，她當時還說：「大家都係成年人，我同以前嘅男朋友都可以做返朋友，將來嘅事將來再算。」姚子羚今年11月便踏入40歲，眼見身邊胡說八道會的好姊妹如胡杏兒、黃智雯及胡蓓蔚等都已名花有主，難免心急搵另一半，故此即使Raymond紀錄不良也不計前嫌，想盡方法箍實男方，堅拒做「黃金剩女」。
採訪、攝影：羅德光、黃曉程、嵐山