劉亦菲主演、耗資2億美元（約15.6億港元）拍攝嘅迪士尼真人電影《花木蘭》（Mulan），之前全球押後上映，但噚日外國票房網站「Box Office Mojo」顯示《花木蘭》上月27日喺挪威上映，截至噚日當地累積票房只有874美元（約6,800港元），而首日開畫票房仲只係得83元美金（約650港元），上映19日票房不似預期。鑑於疫情嚴峻，《花木蘭》暫時未知幾時喺其他國家上映，有香港網民就笑言杯葛佢嘅唔係觀眾，應該係武肺先真。
被嘲遭武肺杯葛
不過對於《花木蘭》係咪真係有喺挪威上映，《蘋果》問過香港迪士尼，對方表示唔回應。
事實上，《花木蘭》似乎真係冇乜noise或者吸引力。呢套戲先係舉行試映會後，外界反應唔理想，迪士尼即決定用四個月時間重拍或補拍，將映期推遲，後來女主角劉亦菲因撐港警濫權濫暴，惹網民發起罷睇。上月喺倫敦舉行首映期間曾經發生小插曲，現場有多名着住黑衣嘅蒙面示威者高舉標語抗議公然撐警嘅劉亦菲，仲呼籲觀眾杯葛呢套戲㖭。
撰文：馮仁昭