早前有傳媒報道，效力巴黎聖日耳門（PSG）嘅巴西球星尼馬，佢嘅52歲阿媽高嘉妮芙禮拜日喺ig公開新戀情，同細尼馬6年、22歲嘅巴西小鮮肉泰亞高拉莫斯一齊。呢件事喺巴西轟動一時，當地傳媒特別為尼馬「哎吔老竇」進行大起底，發現佢背景唔簡單，呢位拉莫斯曾經同多位男性拍拖，更同過尼馬廚師莫路一齊過。有人懷疑佢千方百計埋尼馬身邊，真正嘅目標其實係尼馬！
泰亞高拉莫斯同尼馬阿媽嘅戀情公開咗後，立即成為城中熱話。拉莫斯除咗係一名模特兒外，仲係一名電競直播主，憑健碩身形同型仔外表，喺ig有45萬粉絲追蹤。佢之前仲係一位業餘足球員，曾效力巴西一隊業餘球隊SP Villafranca。不過最爆嘅係，傳媒發現拉莫斯係一位雙性戀者，過去至少有四位前男友，佢曾經同一名巴西男公關奧利華一齊過，奧利華近日仲向巴西媒體表示：「喺2017到18年中，我係同拉莫斯一齊，當佢同尼馬媽媽嘅合照公開後，我個電話就冇停過響。」
爭啲同富豪結婚
拉莫斯之前仲同富豪彭利拿一齊過，佢同富豪彭利拿一齊過三年，當時拉莫斯過住王子般嘅生活，入住彭利拿喺巴西東北部嘅別墅，出入都係坐彭利拿名下嘅靚車，更有傳當時兩位已經去到準備結婚，但最後都分咗手。
之後，唔知拉莫斯係咪有計劃要埋尼馬身，佢同過尼馬嘅好朋友、巴西著名男演員馬亞一齊過，又同過尼馬嘅私人男廚師莫路行埋，所以話拉莫斯最終嘅目標係尼馬都不為過，事關佢一早已經承認自己係尼馬嘅球迷，17年佢曾經私訊過尼馬：「尼馬你真係冇得頂，能夠成為你嘅球迷，我真係唔知道點形容呢個情緒。睇住你比賽，我覺得好有動力，希望有一日我可以識到你，能夠做到你嘅兄弟，大家一齊比賽一齊玩。」
ig合照寫「我愛你」
之後佢又成日去巴黎睇尼馬比賽，今年一月拉莫斯終於成功搵到尼馬集郵，仲將合照發佈上ig：「夢想，永不放棄！我愛你！」二月仲有份出席尼馬嘅28歲生日派對，𠵱家仲要同尼馬嘅媽媽一齊，拉莫斯可以話係用盡方法接近尼馬，唔知尼馬知道拉莫斯嘅底細後，會點樣面對呢位「哎吔老竇」呢？