𠵱家養緊傷嘅皇家馬德里翼鋒夏薩特，近日接受訪問時忽然自爆養傷期間因為太過「為食」，導致自己體重上升，佢聲稱已經開始努力減磅，又控制自己喺屋企嗰陣盡量唔接近廚房。今季因傷經常缺陣嘅夏薩特除咗俾西班牙傳媒批評佢喺皇馬嘅表現外，佢今季「暴脹」嘅身形亦成為焦點。𠵱家喺屋企隔離嘅夏薩特接受電話訪問時承認自己肥胖問題：「呢個問題對我嚟講相當複雜，我已經盡量食少啲同埋避免接近廚房，我以前經常喺廚房食好多麵包，要戒真係唔容易。」夏薩特又表示，𠵱家會同健身教練以視像方式進行健身操練：「我嘅健身教練早前因為唔舒服，嚟唔到我屋企，所以我𠵱家會以視像方式練習，我已經喺有限條件下盡最大嘅努力練習，希望能夠讓膝部傷患盡快恢復同減磅。」