陳慧敏去年踏入29+1的時候，毅然一個人孭着背包去流浪100日，結果險被性侵，驚險萬分。但卻令她遇上來自危地馬拉的P先生，雙方一見鍾情下發展一段相距8,000多公里的異地戀。陳慧敏坦認旅程改變了她，明白世界多變，做人根本不用顧慮太多，目前最重要是誠實面對自己的感情，勇敢到不管結果。
女歌手陳慧敏去年一個人孭着背包進行100日旅行，先後到訪埃及、土耳其、伊朗、印度和巴基斯坦等，其間她遇上危地馬拉男朋友P先生。P先生目前正在土耳其伊斯坦堡的小城市Bodrum暫時安頓下來，於一間學校教授西班牙文及留宿，以Google計算，由陳慧敏居住的澳門至Bodrum的距離是8,210公里。兩人基本上每天都會通電話，繼2月中陳慧敏飛往探望男友後，暫時計劃半年內再見，她指男友想下次來港，但她不會要求他一定做到，免令雙方有壓力。
「佢個人好簡單」
陳慧敏從未試過異地戀及與外國人拍拖：「呢樣唔係我性格，我對愛情一向冇安全感，但嗰100日旅程打破我好多框框，發覺好多嘢冇乜大不了，以前好多planning，但計劃永遠趕唔上變化。呢次旅行我發覺世界好大，好多可能性同選擇，人生唔一定係咁過，你永遠唔會知下一步。」
旅程中，陳慧敏險在埃及被性侵，問到與P先生相識時有否留下陰影？陳慧敏說：「我由埃及去伊斯坦堡要一段時間，當中已經冷靜咗。佢唔係一嚟即向我大獻殷勤，初時我哋大班人玩，之後大家夾先慢慢開始。」為何偏偏選中P先生？陳慧敏即甜絲絲說：「佢個人好簡單，好簡單嘅嘢已經令佢好開心，好似活喺天堂，嗰種態度就係我心目中想要，所以咁吸引我。」P先生雖然收入有限，但卻願意付出所有令女友開心，而陳慧敏亦欣賞他主動解決問題，不會逃避。
誠實面對感情
不少人指陳慧敏是一時衝動及太盲目，她笑言：「好明顯係，會有一億個問題出嚟阻止自己，好多人用未來打敗自己。好多人話我瘋狂，但唔試永遠唔知答案，只要唔後悔就得，我只係誠實面對自己感情，勇敢到不管結果。」惟媽咪大力反對，令她很無奈：「相信係經濟、文化唔同，媽咪好大反應、激動，我只能話𠵱家好開心，只好同媽咪講：『想我開心你就唔好唔開心』」。陳慧敏指男友知媽咪反應後不開心：「始終大家同意唔諗五年、十年後要點，最緊要享受𠵱家關係。我哋唔係成日見，最緊要精神上相愛。」
撰文：寶妮
攝影：沈健程
場地提供：及時派對
髮型：Larry Ho of IlcolpoAveda
