厄甲球隊瓜亞基爾城喺官方twitter發表聲明，話球隊陣中20歲中場艾斯賓路沙，上個禮拜六喺屋企附近遭到射殺，球會高層就話經了解後發現，係兇手點錯相，誤殺艾斯賓路沙。對於球隊發生球員被射殺嘅悲劇，會方喺聲明中對艾斯賓路沙嘅離去表示非常遺憾，仲提到艾斯賓路沙嘅死因：「球會向艾斯賓路沙嘅家人、朋友同埋隊友送上最深切嘅哀悼。艾斯賓路沙係一位好好嘅年輕球員，識得尊重別人，而且接受過良好教育。不過，艾斯賓路沙喺自己屋企門口同兇手不幸相遇，當時兇手誤當佢係其他人而招致殺身之禍。」雖然當地已因武肺實行「禁足令」，但艾斯賓路沙仍難逃呢場悲劇。