多蒙特球星查頓辛祖喺ig直播中疑似暗示自己將會加盟曼聯，令一眾「魔迷」大感興奮。20歲嘅查頓辛祖今季喺德甲表現出色，上陣23場已射入14球同埋攞到15次助攻，成為備受追捧嘅年輕新星。唔少人都預期呢位英格蘭新晉國腳今個夏天會離開多蒙特，外界仲盛傳曼聯、利物浦同車路士等英超Big 6球隊都有意花巨款提出收購。由於球壇因武漢肺炎停擺，粉絲們改喺社交媒體上追蹤球星們，辛祖剛喺禮拜日晚，就喺ig live同球迷互動，並且吸引到一大批粉絲支持，其中有球迷仲提出「如果你將加盟曼聯便飲一啖水」，結果查頓辛祖稍作考慮後，便攞起水樽飲水，似乎暗示自己未來會加盟曼聯。有球迷表示︰「呢件事正在發生！！！」亦有球迷寫道︰「呢個總係會發生嘅。」對辛祖「入魔」似乎充滿期待。
