今次香港人為對抗武漢肺炎疫情，長和系創辦人李嘉誠一直幫助全港醫護搵保護裝備，講效率真係贏話幫香港人全球買口罩嘅特區政府多多聲，而呢幾日香港確診數字大幅回落，超人噚日就發片，舉起隻手指公畀香港醫護，大讚佢哋好嘢。
醫護留言感謝送口罩
李嘉誠基金會噚日喺佢嘅facebook專頁發佈超人呢條只有四秒嘅短片，片入面見到身為基金會主席嘅超人喺陽光底下高舉拇指為醫護加油，笑容滿面指：「香港醫護，好嘢！」
李嘉誠基金會喺條片貼文話，「在陽光絢麗的一天，李先生（李嘉誠）由衷地多謝香港醫護每一位」，留意超人講「每一位」醫護，即係包埋之前罷工爭取政府封關嘅醫護，之後仲有hashtag「#香港醫護了不起#抗疫英雄」。好多網民喺短片下留言，有人讚「醫護同誠哥都好嘢」，又希望超人可以繼續撐小商戶，亦有疑似醫護留言，話感謝誠哥派口罩，佢哋啲同事已收到心意，更加有網民話如果唔係醫護人員罷工，今日香港就死得人多！所以抵誠哥舉手指公讚！
事實上，李嘉誠基金會繼捐資一億元支援武漢醫護後，早於2月已喺全球搜購口罩和防護物資，派送給多個社福機構及長者院舍，合共25萬個口罩，超人仲坐私人飛機由新西蘭返香港時，親自帶來從當地醫療機構助購的5,115件保護衣，送給前線醫護。據悉，李嘉誠基金會近期亦一直有捐贈物資，只係一直未有對外公開，呢個同連許冠傑開抗疫演唱會，都要公開抽吓水領吓功嘅777比，完全係唔同層次。
李八方