英國最富有球會之一嘅阿仙奴，喺今次武漢肺炎疫情下收入都大受影響，據英國《鏡報》透露，球會已向兵工廠球員提出減薪方案，仲話球會財政狀況已經水深火熱，不過聽講阿仙奴班球員已經拒絕咗呢個方案，睇嚟兵工廠要喺球員方面節流唔係咁易。
武肺令英超停擺，作為大球會嘅阿仙奴都受到好大影響，據報球會今季獲得嘅轉播費雖然多達7.5億鎊（約72億港元），而每場比賽嘅營業額亦有200萬鎊，不過由於所有賽事暫停，阿仙奴有可能需要向俾咗轉播費嘅電視台回水，令球會嘅兩大主要收入冇咗大半。
連歐霸席位都唔樂觀
阿仙奴嘅收入雖然多，不過支出同樣驚人，據報每年單係人工開支已經高達2.3億鎊，係全英人工最大開支嘅球會之一，陣中最高薪就係近年表現唔多穩定嘅奧斯爾，周薪成35萬鎊。雖然兵工廠多年嚟用錢非常審慎，但上年度仍然錄得超過2,700萬鎊虧損，𠵱家英超重開無期，加上球隊爭取下屆歐聯又唔樂觀，財政問題一定雪上加霜。
據《鏡報》透露，阿仙奴有個減薪方案（見附表），包括日前向球員提出由今個月起減薪12.5%，為期一年，不過如果球隊成功獲得下屆歐聯參賽資格嘅話，球員就可以拎番全部扣減咗嘅人工；如果只係攞到歐霸盃資格亦都要減7.5%人工。兵工廠𠵱家排英超第九位，落後第4位嘅車路士8分，爭前四難度好高，甚至歐霸席位都未必有，班球員幾乎扣硬人工咁濟，一班槍手就梗係唔制啦。
阿仙奴嘅英國職業球員工會（PFA）代表比利連同班隊友，就傾向拒絕球會呢份減薪方案，而且PFA早前亦呼籲所有英超球員要企硬，現階段唔好接受球會嘅任何減薪方案或者推遲談判時間。不過阿仙奴接受傳媒查詢嗰陣就唔認畀球員拒絕，仲強調談判仲進行緊。
英超賽會滅聲唔提復賽
直至家陣為止都未有英超球隊嘅球員同意減薪，只係傳過李斯特城嘅球員可能會同意減薪；而修咸頓同韋斯咸就會推遲減薪談判。雖然各大英超球會同球員嘅減薪談判未有結果，不過英超賽會近日就率先執行「封口令」，禁止當地體育傳媒Sky Sports同BT Sport喺專訪球員同領隊嗰陣，提問任何關於英超暫停對球員所受影響嘅問題，包括比賽幾時重開等等。
英國《每日郵報》日前就將Sky Sports發畀員工嘅電郵曝光，證實電視台受到來自英超賽會嘅壓力，要求佢哋遵照合約，採訪嗰陣提問一啲有趣同輕鬆嘅問題，實行維穩。