八方之前寫公民黨余德寶喺復活節為藝人吳日言嘅黃店做義工賣飯糰，俾左派抹黑佢係瀆職，但余德寶一於當佢冇到，噚日再接再厲，拍住該黨立法會議員譚文豪（Jeremy）再為吳日言做義工賣飯糰，由於左報早前用「神邏輯」質疑議員嘅薪水唔屬於議員，Jeremy話佢噚日喺放假嘅時間，一定係屬於自己嘅，所以做義工一定無問題，仲話好期待揸佢最愛嘅電單車，為黃店送外賣，希望嚟緊可以為黃色經濟圈再出一分力喎。
余德寶：建制抹黑「居功」不少
武漢肺炎影響下，旺角站出口明顯少咗好多人，但無減Jeremy同德寶sell飯糰嘅熱情。佢哋除咗摩打口咁不停向途經巿民講「今日食咗飯糰未啊？」、「買個飯糰試吓吖！」，更喺街上舉牌呼籲巿民幫襯，工黨前代主席趙仕信都有到場支持。
短短一粒鐘，兩人已賣出近50個飯糰，當中除咗有Jeremy嘅女fans特登由筲箕灣過海嚟買飯糰，再同Jeremy嚟個selfie留念，亦有一家三口嘅巿民一口氣買成十幾個飯糰，令店舖要極速補貨。余德寶話呀，有街坊話因為見到佢俾左報同民建聯狙擊而特登嚟入貨，似乎黃色經濟圈至今生生不息，左報同民建聯嘅抹黑都「居功」不少。