【黑鏡線索】
武漢肺炎全球肆虐，科技界裏面，有公司受惠，主要係同work from home有關嗰啲，最出名嘅例子當然係Zoom，三個月嚟試過升成倍。上年上市嘅Slack，亦都趁機發債，只係0.5厘息，其他條件亦都對公司好着數，基本上係free money，集多咗彈藥又唔使畀股票。
各國封城，有科企受害。唔出街，就當然唔使搭車，Uber梗係都受影響，不過至少上咗市，銀行戶口仲有10B美金，可以捱一輪。
又例如WeWork，上年已經出事，本身盤數爛，上市失敗之後，創辦人同最大投資者孫正義嗌交，創辦人被炒，再加埋武肺，個個唔出得街，仲邊有咁多人去cowork space，短租約實cut。
面對武肺 Airbnb內憂外患
同樣未上市嘅，係Airbnb。疫情之下，旅遊業首當其衝，Airbnb當然勁受打擊。上年第四季，武肺發生之前，Airbnb營業額1.1B，蝕276M，即係一季要使1.4B。而家旅遊停擺，Airbnb有幾多錢喺銀行？2B。即係唔捱得幾多個月，惟有發債。
頭先講過，Slack發債傍吓身，代價0.5厘，幾乎免費。Airbnb發債救命，幾多厘？11厘，仲附帶其他頗辣嘅條件。
除咗公司借貴錢，仲有佢啲hosts都出事。冇人租屋，咁啲hosts梗係收入大減。收入大減，但係繼續有支出，買樓做host嘅，仲要每個月供樓。租樓做host嘅，就要繼續畀租。唔少hosts槓桿到頗盡，平時自覺掌握好晒旺季淡季行情，邊有咁多個會預埋幾個月零收入。
做hosts喺正常情況好似好有得計，但係做生意梗有風險，一鋪武肺，隨時有大量hosts沒頂。萬一大量hosts收檔，即等如Airbnb有大量貨源消失，Airbnb惟有出手救吓，暫時宣佈咗攞250M出嚟救市，睇吓疫情持續幾耐，救到幾多。
除咗公司同hosts，受害嘅仲有Airbnb員工。裁員減薪嗰啲就大把公司都係，唔係Airbnb獨有問題。問題係，其實好多員工，期待咗Airbnb上市好耐。矽谷文化，呢類VC backed嘅公司，啲人早期肯入去捱，公司承諾嘅，就係一旦IPO，可以有錢分。
一波三折 員工收成無期
Airbnb早期員工，難得上千上萬間startups裏面，扑中咗搞得大嘅Airbnb，梗係心急收成。Airbnb曾經發過兩批restricted stocks，員工手執呢啲RSUs，就係等套現一日。眼見Uber呀Slack呀都上，管理層梗係你急佢唔急，因為高層自己就賣咁咗啲，但員工就唔畀賣。為咗上市一事，公司裏面越谷越多怨氣，去到集體寫信鳴冤。終於上年年頭，請咗個專人負責搞上市，點知嗰個人一上任就滑雪整親瞓醫院，又拖慢咗。終於搞到上年9月，正式宣佈會喺2020上市。
結果，撞正百年一遇大瘟疫。咁你話最多咪再等吓囉，橫掂都等咗咁耐。問題係，啲RSUs有賞味日期，一批係下年年中，另一批，係今年11月，過咗上唔到，就變廢紙。係，廢紙。所以都係嗰句，一日未見money in the bank，一日都未算係你嘅，正如政府聲稱會還畀大家嗰一萬蚊一樣。
撰文：宋漢生
fb : sunghsblog