皇家蘇斯達（圖）計劃最快喺周二復操，將會成為西甲停擺之後首支重投訓練嘅球隊。球隊喺上周六聲明度話，自從受到疫情影響，一眾球員都按要求留喺屋企訓練，一旦政府容許，球員周二就可以選擇返Zubieta基地，不過都仍然會單獨訓練。皇蘇喺聲明度又話︰「會方已經同一隊達成協議，如果今季重開唔到，球員會減薪兩成，重啟到就減薪5%。呢個係同所有有關人士一齊做嘅決定，令我哋避免影響到其餘僱員，同時喺比賽暫停令收入減少下可以平衡球會財政。」另外，皇蘇又宣佈會退款20%畀持有季票嘅球迷。喺西甲上月停擺前，皇蘇喺積分榜排第四位，亦躋身對畢爾包嘅西班牙盃決賽，不過決賽日期仲未確定。