各地聯賽停擺下，球隊收入縮晒水，傳統豪門都受到影響。據英國傳媒報道，英超Big 6之一嘅阿仙奴就向球員提議，只要今季拎到歐聯資格，就可以唔使減薪。同其他英超球隊一樣，阿仙奴經濟損失慘重，尤其球隊係全英超比賽門票價格最貴嗰隊，比賽日收入就佔球隊全部收入成25%，冇波踢真係好影響。報道指雖然英超球隊對減薪問題仲有分歧，但阿仙奴都有同球員討論過，管理層就提議只要拎到下季歐聯參賽資格，球員就唔使減薪。不過，阿仙奴自2017年以嚟就冇打入過歐聯，雖然喺阿迪達執掌後球隊成績有進步，但聯賽停擺前阿仙奴只係排第九，要入前四談何容易。難怪早前就傳將會賣走隊長奧巴美揚，似係為減磅做好準備。